t1114-td.mp3 གསན་ན།
འོད་ཟེར་གྱི་གླེང་སྟེགས།
བོད་རྒྱའི་ཐེངས་བརྒྱད་པའི་གྲོས་མོལ་འདི་ཁ་ཕྱོགས་འགྱུར་བ་ཞིག་ཡིན་པ་མངོན་གསལ་དོད་པོ་རེད། པེ་ཅིང་ཕྱོགས་ནས་རྣམ་འགྱུར་གྲང་མོའི་ཐོག་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དབུས་གཞུང་དང་བཀའ་མོལ་གནང་ཡག་གི་ཐོབ་ཐང་རྩ་བ་ནས་མེད་པ་ཁྱབ་བསྒྲགས་བྱས་ཡོད། གྲོས་མོལ་ལ་ཐེ་ཇུས་ཡོད་མཁན་ཐབ་ཕྱོགས་གཅིག་གྱུར་ལས་ཁུངས་ཀྱི་འགོ་ཁྲིད་གཞོན་པས་གསར་འགོད་ལྷན་ཚོགས་སྟེང་གུས་ཞབས་རྩ་བ་ནས་མེད་པའི་ཐོག་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནི་མ་རུང་ཁོག་བཅངས་གནང་མཁན་ཅེས་མཚན་སྨྲས་ཞུས་པ་དང་། ༧གོང་ས་མཆོག་ནས་གསུང་ཡག་ནི་མགོ་སྐོར་བཏང་བའི་རྫུན་གཏམ་ཡིན་བརྗོད་ཡོད། ཐ་ན་གསར་འགོད་ལྷན་ཚོགས་ཐོག་ཏེང་ཤའོ་ཕིང་གིས་ལོ་ངོ་སུམ་བཅུའི་སྔོན་བརྗོད་པ་དང་མི་ཚོས་རྟག་ཏུ་བེད་སྤྱོད་བྱེད་བཞིན་ཡོད་པའི་བོད་རང་བཙན་ཕུད་པའི་དེ་མིན་ག་རེ་ཡིན་རུང་བརྗོད་ན་ཆོག་ཟེར་བའི་སྐད་ཆ་རྙིང་པ་འདིར་ཡང་ཁས་ལེན་བྱས་མེད་པ་རེད། དེར་རྟེན་ཚང་མས་གུས་བཀུར་ཞུ་ཡུལ་གྱི་བོད་པ་ཞིག་ནས་ཁོང་ཁྲོ་ཆེན་པོའི་ངང་འདི་ནི་བཙན་དབང་རིང་ལུགས་རང་རེད་ཅེས་གསུང་གི་འདུག
བོད་ནང་གི་བོད་མི་མང་པོ་ཧ་ལས་པ་དང་ཞེན་པ་ལོག་པའི་ཁྲོད་ནས་འདི་ནི་བསམ་ཡུལ་ལ་ཡོད་པའི་མཐའ་འབྲས་ཡིན་པར་ངོས་འཛིན་བྱེད་ཀྱི་ཡོད། མཐའ་འབྲས་འདི་པེ་ཅིང་གིས་རྒྱལ་སྤྱིའི་ཁྲོད་དབྱུག་པའི་སྐབས་བསམ་དོན་མཐར་མངོན་པ་ནང་བཞིན་མ་བྱས་རང་བྱས་བཟོས་པའི་གཏུམ་ཉམས་ཡོད་པ་རེད། ཡིན་ནའི་འདི་ནི་ངོ་གདོང་ངོ་མ་དེ་ཕྱིར་བཏོན་ཡོད་པ་མ་ཟད། ད་དུང་ཐོག་རྒྱབ་པ་བཞིན་བོད་མི་ཚོའི་སེམས་གཏིང་ལ་ཡོད་པའི་འཆར་སྣང་ཆུང་ངུ་འདི་ཡང་མེད་པ་བཟོས་ཡོད། བསམ་པ་རྣམ་དག་མེད་པའི་བཙན་བཤེད་རིང་ལུགས་ཀྱི་ཁ་གཏད་དང་གྲོས་མོལ་བྱས་པ་ཡིན་ན་འབྲས་བུ་ཐོན་རྒྱུ་མེད་པ་སྔ་ས་ནས་ཤེས་པ་དང་ད་དུང་རེ་བ་ཆེན་པོ་བྱེད་རིན་མེད་པ་ཡང་ཤེས་ཀྱི་ཡོད་རུང༌། ཐེངས་བརྒྱད་པའི་གྲོས་མོལ་བྱུང་བའི་རྗེས་གཞི་ནས་པེ་ཅིང་གི་ཡ་ང་སྙིང་རྗེ་མེད་པའི་གྲོས་མོལ་གྱི་རྐྱེན་པས་ཁྱོན་ཡོངས་ནས་རེ་བ་སྟོང་ཟད་དུ་ཕྱིན་ཡོད། བོད་མི་འགའ་རེས་བརྗོད་དོན་ལ། རེ་བ་སྟོང་ཟད་དུ་འགྱུར་བའི་སྐབས་གཅིག་བྱས་ན་འགྱུར་ལྡོག་གི་རྣམ་པ་གསར་པ་ཞིག་ཡིན་སྲིད་ཀྱི་རེད་ལ། དེ་ལས་ལྡོག་སྟེ་དཀའ་གནད་སེལ་བའི་རྣམ་པ་གསར་པ་ཞིག་ཡོང་སྲིད་ཀྱི་རེད།
བོད་རྒྱའི་འབྲེལ་བར་འགྱུར་ལྡོག་ཆེན་པོ་འགྲོ་བ་མཐོང་བཞིན་ཡོད་པའི་སྐབས་དེར་འཇིག་རྟེན་འདིའི་འགྱུར་ལྡོག་ལ་ཕྱིར་མིག་ལྟ་དུས་རྒྱལ་རབས་ལོ་རྒྱུས་ག་དུས་ཡིན་རུང་འདྲ་པོ་ཡོད་པ་ཤེས་རྟོགས་ཐུབ་ཀྱི་ཡོད། གུས་མོས་ཞུ་ཡག་ནི་ངས་རྒྱ་ནག་གསར་པ་འཛུགས་སྐྲུན་བྱེད་མཁན་མའོ་ཙེ་ཏུང་གི་རྩོམ་ཡིག་གཅིག་ད་ལྟ་རང་མཐོང་བྱུང༌། འདི་ནི་ཁོ་པར་སྲིད་དབང་རགས་གྲབས་ཡོད་པའི་སྐབས་དེར་བྲིས་པ་ཞིག་རེད་འདུག ཁོ་པས་ཆེད་མངགས་བཙན་རྒྱལ་རིང་ལུགས་དང་དེ་བཞིན་རྒྱུགས་ཁྱི་ཨ་རི་དང་གོ་མིང་ཏང་ཅེས་བརྗོད་ཡོད་པ་མ་ཟད། ད་དུང་ཁོ་པས་རྒྱ་ནག་གི་མི་དམངས་ལ་འབོད་སྐུལ་འདི་འདྲ་ཞིག་བྱས་ཡོད་པ་སྟེ། འཕྲུལ་སྣང་སྟོང་པ་འདི་རྒྱབ་སྐྱུར་བྱས་ནས་འཐབ་རྩོད་བྱ་རྒྱུའི་གྲ་སྒྲིག་བྱེད་དགོས་ཅེས་བརྗོད་ཡོད། གུས་མོ་ནི་མའོ་ཡིས་རྒྱུགས་ཁྱི་མིན། ང་རང་འཚར་ལོངས་བྱུང་བའི་ལོ་ཟླའི་ནང་དེ་སྔོན་མའོ་ནི་ཀླད་པ་འཁྲུས་ནས་སློབ་གསོ་སྤྲད་པའི་གུས་མོ་དང་གྲངས་ལས་འདས་པའི་མི་ཚོའི་ཀླད་པའི་ནང་གི་ལྷ་གཅིག་བྱས་ཡོད་པ་ཡིན་རུང༌། འདིར་གུས་མོས་ངེས་པར་དུ་ངོས་འཛིན་བྱེད་དགོས་པ་ཞིག་ལ། གཞན་བརྗོད་མི་དགོས་པར་ང་ཚོས་རྩོམ་ཡིག་འདིའི་ནང་ནས་དོན་དངོས་དང་མཐུན་པའི་དོན་སྙིང་གཅིག་མཐོང་ཐུབ་རྒྱུ་ནི་བསྡད་ས་བརྗེ་པ་རྒྱབ་ནས་བསམ་བློ་བཏང་རྒྱུ་འདི་རེད།
མའོ་ཡིས་བརྗོད་དོན་ལ། བཙན་རྒྱལ་རིང་ལུགས་ཕྱོགས་ཁག་གི་བཤས་གྲི་འདི་རྩ་བ་ནས་བཞག་གི་མ་རེད་ལ། ཁོང་ཚོ་རྩ་མེད་མ་ཆགས་བར་དུ་ཁོང་ཚོ་སངས་ཡང་རྩ་བ་ནས་རྒྱས་ཀྱི་མ་རེད་ཅེས་དང༌། བཙན་རྒྱལ་རིང་ལུགས་པར་ཁ་ཏ་བསླབ་བྱ་རྒྱབ་སྟེ་བྱམས་སེམས་བཏོན་པའི་རེ་བ་བྱེད་ཀྱི་ཡོད། ཁ་སྐོར་ཤེས་ན་སྐམ་སར་སླེབས་ཟེར་བ་འདི་ཡོང་སྲིད་ཀྱི་མ་རེད། ཐབས་ལམ་ཡོད་པ་གཅིག་པོ་འདི་ནུས་ཤུགས་གཅིག་ཏུ་སྒྲིལ་ནས་ཁོང་ཚོར་འཐབ་རྩོད་བྱེད་རྒྱུ་འདི་རེད་ཟེར་བརྗོད་མྱོང་ཡོད་པར་རྟེན་མའོ་ཡིས་བསམ་བློ་གསལ་པོ་བཏང་ཐུབ་མཁན་གྱི་མི་ཚོར་འོས་འགན་ཡོད་པའི་ཐོག་ནས་མཐུན་སྒྲིལ་བྱེད་དགོས་པ་དང་ནང་ཁུལ་གྱི་དཀྱིལ་ལ་བསྡད་མཁན་གྱི་རིམ་པ་དང་བར་གནས་ཤོག་ཁག རིམ་པ་ཁག་ནང་གི་རྗེས་སུ་ལུས་མཁན། དེ་བཞིན་གཡོ་འགུལ་ཐེ་ཚོམ་ཡོད་མཁན་གྱི་མི་ཐམས་ཅད་ལ་ཀུན་སློང་བཟང་པོའི་ཐོག་ནས་ཁོང་ཚོར་རོགས་རམ་བྱེད་པ་དང་ཁོང་ཚོའི་གཡོ་འགུལ་གྱི་རང་བཞིན་འདིར་སྐྱོན་བརྗོད་བྱས་ནས་ཁོང་ཚོར་སློབ་གསོ་རྒྱབ་སྟེ་ཁོང་ཚོ་མི་དམངས་དམངས་ཀྱི་ཕྱོགས་སུ་ལངས་ཐུབ་པའི་འབད་བརྩོན་དང་བཙན་རྒྱལ་རིང་ལུགས་ཀྱི་ཕྱོགས་སུ་ཁོང་ཚོ་ཐེན་མི་བཅུག་པ་བྱེད་དགོས་ལ་ཁོང་ཚོར་འཕྲུལ་སྣང་སྟོང་པ་འདི་རྒྱབ་སྐྱུར་བྱས་ནས་འཐབ་རྩོད་བྱ་རྒྱུའི་གྲ་སྒྲིག་བྱེད་དགོས་ཟེར་ལབ་དགོས་ཀྱི་ཡོད་ཅེས་མའོ་ཡི་བརྗོད་ཡོད།
ཡང་འཐབ་རྩོད་ཟེར་བ་དེ་ད་ལྟའི་དུས་ཚོད་འདི་དང་ང་ཚོའི་ངོས་ནས་ཞུས་ན་མའོ་ཡི་ཁྲག་དྲི་བྲོ་བའི་དྲག་ཤུགས་ཀྱི་གསར་བརྗེ་དང་གྲལ་རིམ་འཐབ་རྩོད་ཀྱི་དོན་སྙིང་འདི་མངོན་གྱི་ཡོད་པ་མ་རེད། འཚེ་བ་མེད་པའི་བྱེད་སྟངས་འདི་ཡང་འཐབ་རྩོད་ཞིག་ཡིན་པ་མ་ཟད། ད་དུང་འདི་ནི་དེ་བས་གཟི་བརྗིད་ཆེ་བ་དང་ཕུགས་རྒྱང་རིང་པོའི་འཐབ་རྩོད་ཞིག་ཡིན་པ་རེད། མི་མི་རེ་ངོ་རེའི་ངོས་ནས་ཞུས་ན། འཐབ་རྩོད་ཀྱི་དོན་སྙིང་འདི་སོ་སོ་ནས་འགོ་བཙུགས་ཏེ་བྱེད་དགོས་ཀྱི་ཡོད་པ་དང་ད་ལྟ་ནས་འགོ་བཙུགས་ཏེ་བྱེད་དགོས་ཀྱི་ཡོད་པ་རེད་ལ། ཞིབ་ཕྲའི་གནས་ཚུལ་ཐོག་ནས་འགོ་བཙུགས་ཏེ་ལས་དོན་སྤེལ་ནས་ང་ཚོ་བོད་པ་གཅིག་ཡིན་པའི་ལས་འགན་ཁུར་དགོས་ཀྱི་ཡོད། ཐ་ན་ཉིན་རེའི་འཚོ་བའི་ནང་གི་ལས་ཀ་ཆུང་ངུ་གང་འདྲ་ཞིག་ཡིན་རུང་འདིའི་ཐོག་འབད་བརྩོན་བྱས་པ་འདི་ཡང་འཐབ་རྩོད་གཅིག་ཡིན་པ་རེད། ངེས་པར་དུ་སེམས་ནང་བཅངས་དགོས་པ་ནི་འཐབ་རྩོད་ཟེར་བ་འདི་སྟངས་འཛིན་བྱེད་ཡག་མེད་པ་ཞིག་མ་ཡིན། འདི་ནི་སྟངས་འཛིན་བྱེད་རྒྱུ་ཡོད་པ་ཞིག་དང་། འཐབ་རྩོད་ཟེར་བ་འདི་ངར་ལངས་ཡག་གཅིག་མ་ཡིན་པར་འདི་ནི་བསམ་བློ་གཟབ་ནན་བཏང་དགོས་པ་གཅིག་རེད། འཐབ་རྩོད་ཟེར་བ་འདི་ངེས་པར་དུ་གཞི་རྒྱ་ཆེན་པོ་དང་ཡིད་སྐྱོ་ཞིང་བརྗིད་ཉམས་ལྡན་པ་ཞིག་ཀྱང་ཡིན་དགོས་ཀྱི་མེད་ལ། ད་དུང་འདི་ནི་མི་མི་རེ་ངོ་རེའི་ཐོབ་ཐང་དོན་ཐོག་འཁྱོལ་བ་མ་ཟད་བློ་སྟོབས་ཆེན་པོས་འདིར་སྲུང་སྐྱོབ་བྱེད་དགོས་ཀྱི་ཡོད། དེ་ཡང་རྒན་འཁོགས་དང་གཞོན་སྐྱེས། ཕྲུ་གུ་ སྐྱེས་པ་དང་བུད་མེད། གྲ་བཙུན་དང་མི་སྐྱ་སོགས་སེམས་ཅན་ཐམས་ཅད་ཀྱི་ཐོབ་ཐང་ལ་སྲུང་སྐྱོབ་བྱེད་དགོས་ཀྱི་ཡོད།
འཕྲུལ་སྣང་སྟོང་པ་འདི་རྒྱབ་སྐྱུར་བྱེད་པ་ཟེར་བའི་ཕུགས་རེ་དེ་བློས་གཏོང་བྱེད་དགོས་པ་མ་ཡིན། བོད་པའི་གཞོན་སྐྱེས་གཅིག་གིས་བརྗོད་པར། སྤྱི་ལོ་༢༠༠༨ལོའི་ཟླ་༡༡ཚེས་༤ཉིན་ནི་ཁོང་གི་མི་ཚེའི་ནང་གི་མཛེས་སྡུག་ལྡན་པའི་ཉིན་མོ་ཞིག་ཡིན་པ་དང་འོས་ཤོག་དབྱུག་པའི་དབང་ཆ་མེད་ན་ཡང་ཁོང་གིས་Obamaལ་ཨ་རིའི་སྲིད་འཛིན་གྱི་རྒྱལ་ཁ་འདི་ཐོབ་པར་དགའ་བསུ་ཞུ་ཡི་ཡོད་པ་གསུང་བྱུང༌། གང་ཡིན་ཞུས་ན་Obamaརྒྱལ་ཁ་ཐོབ་པ་འདི་རྒྱལ་རབས་ལོ་རྒྱུས་ཀྱི་རང་བཞིན་ལྡན་པ་ཞིག་ཡིན་པས་དངོས་ཡོད་ཀྱི་གནས་ཚུལ་འདིའི་ཁྲོད་ནས་མི་རྣམ་ལ་ར་སྤྲོད་ཐུབ་རྒྱུར་གང་ཡིན་རུང་ཡོང་མི་སྲིད་པ་མེད་པ་དང་དེ་སྔོན་མི་ཚོས་ཡིད་ཆེད་བྱེད་མཁན་མེད་པའི་རྨི་ལམ་འདི་ད་ཆ་མངོན་འགྱུར་ཡོང་གི་ཡོད་པས་དེར་རྟེན་ང་ཚོའི་དེ་རིང་གི་རྨི་ལམ་འདི་སང་ཉིན་མངོན་འགྱུར་བྱེད་ཐུབ་ཀྱི་མ་རེད་དམ། དེ་ལྟ་བུའི་སང་ཉིན་འདི་ངེས་པར་དུ་འཐབ་རྩོད་བྱས་ནས་རགས་པ་བྱེད་དགོས། གལ་ཏེ་མར་སྤྲད་ནས་ཐོབ་ཡག་ཡོད་པ་ཞིག་ལ་ངོས་འཛིན་བྱས་པ་དང་། ཡོད་ཚད་ཐམས་ཅད་མགྱོགས་པོ་ཞིག་དང་སྟབས་བདེ་པོའི་ངང་ནས་མངོན་འགྱུར་ཡོང་ཐབས་མེད་པ་རེད། ཡོད་ཚད་ཐམས་ཅད་མགྱོགས་པོ་དང་སྟབས་བདེ་པོའི་ངང་ནས་གྲུབ་ཐུབ་ཀྱི་ཡོད་པར་ངོས་འཛིན་བྱེད་ཀྱི་ཡོད་ན་འདི་ངེས་པར་དུ་རྒྱབ་སྐྱུར་བྱེད་དགོས་པའི་འཕྲུལ་སྣང་ཞིག་རེད།
གསན་མཁན་རྣམ་པ་ཚོ་དེ་རིང་གི་ལེ་ཚན་འདི་སྙན་སྒྲོན་ཞུ་མཚམས་འདིར་བཞག་གི་ཡིན། གོང་ཞུས་ཀྱི་ལེ་ཚན་འདི་རྩོམ་པ་རང་ཉིད་ཀྱི་གཟིགས་ཚུལ་ཡིན་པ་ལས་འདི་ག་ཨེ་ཤི་ཡ་རང་དབང་རླུང་འཕྲིན་ཁང་གི་ལྟ་བ་ཡིན་པས་ཁྱབ་ཀྱི་མེད་ལ་ང་ཚོའི་གསམ་མཁན་རྣམ་པ་ཚོས་ལེ་ཚན་འདི་གསན་པར་ཐུགས་བརྗེ་ཆེ་ཞུ་རྒྱུ་དང་ལེ་ཚན་འདི་ཕབ་སྒྱུར་དང་སྙན་སྒྲོན་ཞུ་མཁན་སྒྲོལ་དཀར་ཡིན།
Filed under: Uncategorized
