t1107-td.mp3 གསན་ན།
འོད་ཟེར་གྱི་གླེང་སྟེགས།
རྒྱལ་རབས་ལོ་རྒྱུས་ཐོག་བོད་ཕྱི་ནང་གཉིས་ཀྱི་བོད་མིའི་སེམས་ལ་ཤུགས་རྐྱེན་ཐེབས་ཐུབ་པའི་ཚོགས་ཆེན་དེ་རིགས་ཕལ་ཆེར་ཚོགས་མྱོང་མེད། འདི་ནི་དང་ཐོག་རྒྱལ་རབས་ལོ་རྒྱུས་ཐོག་བོད་མི་ཚོ་དུས་ཡུན་རིང་པོ་འདི་འདྲ་ཁ་བྲལ་ཏེ་རྩ་བ་ནས་བསྡད་མྱོང་མེད་པའི་དབང་གི་ཡིན་པ་རེད། བཙན་བྱོལ་ལ་ཡོད་པའི་བོད་མི་འབུམ་གཅིག་ལྷག་ཙམ་གྱི་ངོས་ནས་ཞུས་ན། རི་བོ་ཧི་མ་ལ་ཡའི་ཕྱོགས་ཕ་རོལ་ལ་ཕ་ཡུལ་བོད་འདི་ཡོད་པ་དང༌། ཡང་བོད་ནང་དུ་ལུས་པའི་ས་ཡ་དྲུག་ལ་ཉེ་བའི་བོད་མི་ཚོའི་ངོས་ནས་ཞུས་ན། རི་བོ་ཧི་མ་ལ་ཡའི་ཕྱོགས་ཕ་རོལ་ལ་ཡང་བོད་ཞིག་ཡོད་པ་རེད། དེ་ཆུང་ཆུང་ཡིན་རུང་བོད་ཀྱི་བླ་སྲོག་འདིར་འདུས་ནས་ཡོད། ཟླ་བ་འདིའི་ནང་རིའི་ཕ་རོལ་དུ་བཞུགས་སྒར་རྡ་རམ་ས་ལ་སྟེ་བཙན་བྱོལ་བོད་གཞུང་གནས་ཡུལ་དུ་འཛམ་གླིང་ས་ཕྱོགས་ཁག་ནང་གནས་པའི་བོད་མིའི་ཚོགས་ཆེན་གཅིག་སྐོང་འཚོགས་གནང་ནས་བོད་ཀྱི་མ་འོངས་པའི་འགྲོ་ཕྱོགས་ཐད་བགྲོ་གླེང་གནང་གི་ཡོད་པ་འདི་དུས་རབས་འབྱེད་པའི་བྱ་སྤྱོད་ཞིག་ཡིན་པ་མངོན་གསལ་དོད་པོ་རེད། ཡང་ཟླ་བ་དགུ་པའི་ཟླ་སྟོད་ལ་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་གསལ་སྟོན་གནང་བར་བོད་ཀྱི་གནད་དོན་འདི་བོད་མི་དམངས་ཀྱིས་ཐག་གཅོད་བྱེད་དགོས་པ་ཞིག་དང་བོད་ཀྱི་མ་འོངས་པའི་མདུན་ལམ་འདི་བོད་མི་དམངས་ཀྱིས་གཏན་འབེབས་བྱེད་དགོས་ཀྱི་ཡོད་པ་བཀའ་རྩལ་གནང་མྱོང་ཡོད།
བོད་ནང་ཡོད་མཁན་གྱི་བོད་མི་ཞིག་གི་ངོས་ནས་ཞུས་ན་བཙན་དབང་གི་བཙན་གནོན་འོག་ཡོད་པས་ཕྱི་ཕྱོགས་ལ་ཡོད་པའི་བོད་མི་ནང་བཞིན་གང་བསམ་པ་འདི་ལྷུག་པོའི་ངང་བརྗོད་ཐུབ་ཀྱི་མ་རེད། ཡིན་ན་ཡང་དཀའ་སྡུག་འདི་ནས་ཐར་བའི་ཆེད་འཇིགས་སྣང་གི་སྐད་སྒྲ་འདི་སྟོན་ཐུབ་པའི་རེ་བ་བྱེད་བཞིན་ཡོད། བོད་ནང་གི་དེང་རབས་ཤེས་ཡོན་ཅན་ཁག་གཅིག་གི་བསམ་ཚུལ་ཕྱོགས་བསྡོམས་ཞུས་ཡོད་པ་སྟེ། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དགོངས་པ་འདི་ཏག་ཏག་གནས་ལ་འཁེལ་བ་ཞིག་ཡིན་པར་ངོས་འཛིན་གནང་གི་འདུག ལྟ་དུས་འདི་འདྲ་མ་གནང་དཀའ་མེད་ཡིན་པ་ལྟ་བུ་ཡོད་རུང་། འདི་ནི་མ་འོངས་པར་གྲ་སྒྲིག་དེ་བས་མང་བ་ཞིག་གནང་ཡོད་པ་འདི་ཡིན། མ་འོངས་པར་ལམ་གང་འདྲ་ཞིག་འདེམས་ནས་སྐྱོད་ན་ཡང་ཚང་མ་ནམ་ཡང་མི་འགྱུར་བ་ཞིག་ཡིན་སྲིད་ཀྱི་མ་རེད། ལམ་འདི་མིན་ན་ལམ་གཞན་ཞིག་ཡིན་དགོས་པ་གཅིག་དང་། ཡང་ལམ་གཞན་འདི་མིན་ན་ངེས་པར་དུ་ལམ་འདི་ཡིན་དགོས་པ་ཞིག་མིན་ལ། ལམ་འདི་དང་ལམ་གཞན་ཞིག་དང་ཡང་ན་ལམ་གཞན་ཞིག་དང་ལམ་འདི་ཐ་ན་ལམ་འདི་གཉིས་ཀ་མ་ཡིན་པར་ལམ་སྣ་ཚོགས་འབྲེལ་ནས་ཡོད་པའི་ལམ་བཞི་མདོ་དང་བསྐྱོར་ཟློས་ཡང་ཡོང་སྲིད་པ་རེད། ད་ལྟའི་འཆར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་བཀའ་གནང་བ་བཞིན་དེ་སྔོན་གྱི་ཞི་བའི་མཐུན་འགྲིག་དང་ཕྱིར་བཤོལ་གཟོད་སྒོམ་གནང་བ་འདི་དོན་ཕན་མ་སོན་པ་ཞིག་ཡིན་པ་ར་སྤྲོད་ཐུབ་ཡོད་པས་དེར་རྟེན་བོད་མི་ཚོས་འདོད་པ་ཡོད་མིན་འདི་མ་ཡིན་པར་དེ་སྔོན་གྱི་ལམ་འདིའི་ཐོག་མུ་མཐུད་སྐྱོད་ཐུབ་ཐབས་མེད་པ་འདི་ཡིན་པ་རེད།
ཨ་མདོའི་དགོན་པ་གཅིག་གི་དགེ་འདུན་པ་བཅུ་གྲངས་ཞིག་ཡོད་པ་ཁོང་རྣམས་ཀྱི་དགུང་གྲངས་ནི་ཉི་ཤུ་ནས་སུམ་བཅུར་སླེབས་མ་སླེབས་ཡིན་པ་རེད། འདི་ལོ་ཟླ་བ་གསུམ་པ་ནས་བཟུང་ཐོན་པའི་ངོ་རྒོལ་གྱི་ལས་འགུལ་ནང་ཁོང་ཚོ་ཚང་མ་འཛིན་བཟུང་བྱེད་མྱོང་ཡོད་ལ། ཉེས་རྡུང་ཕོག་མྱོང་ཡོད་པ་དང་དགེ་འདུན་པ་འགའ་རེའི་ལག་པའི་སྟེང་ཐ་ན་དམག་མི་དང་ཉེན་རྟོག་པས་ལྕགས་རྐུད་ཀྱིས་བསྡམས་པའི་རྨ་རྗེས་ཡང་ཡོད་པ་རེད། ཁོང་ཚོས་གསུར་པར། བོད་མི་ཚོས་དཀའ་སྡུག་འདི་མྱོང་ཡོད་པ་དང་རང་དབང་མེད་པའི་སྡུག་བསྔལ་གྱི་ནང་འཚོ་བ་བསྐྱལ་བཞིན་ཡོད་པ་ཡིན་རུང་ནང་པའི་ཤུལ་འཛིན་པ་ཞིག་གི་ངོས་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དབུ་མའི་ལམ་འདིར་བརྩི་སྲུང་ཞུ་རྒྱུ་ཡིན། འཚེ་མེད་ཞི་བའི་ཐབས་ལམ་གྱི་ཁྲོད་ནས་བོད་མིའི་ཐོབ་ཐང་ལ་འབད་བརྩོན་ཞུ་རྒྱུ་ཡིན་པས་མ་འོངས་པར་དཀའ་སྡུག་གང་འདྲ་ཞིག་ཡོད་རུང་མུ་མཐུད་དེ་ཞི་བའི་ལྟ་གྲུབ་ཀྱི་ཐོག་ནས་དབུ་མའི་ལམ་གྱི་ཐོག་སྐྱོད་དགོས་ཀྱི་རེད་ཅེས་གསུང་བྱུང༌།
ལྟ་ཚུལ་དྲག་པོ་འཛིན་མཁན་ཡང་ཡོད་པའི་ཁྲོད་ནས་ངོས་འཛིན་གནང་བར། ཐོག་མར་སྤྱི་ནོར་༧གོང་ས་སྐབས་མགོན་ཆེན་པོ་མཆོག་ནས་རང་བཙན་གྱི་ལམ་ཐོག་ཕེབས་ཡོད་པ་དང་རྗེས་ལ་རིམ་པས་འགྱུར་བ་བཏང་གནང་ཡོད། ལྷག་པར་དུ་ཏེང་ཤའོ་ཕིང་ནས་རང་བཙན་ཕུད་པའི་དེ་མིན་ག་རེ་ཡིན་རུང་གླེང་ན་ཆོག་ཟེར་བའི་རྗེས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་རྒྱལ་སྤྱིའི་ཁྲོད་རང་བཙན་དོར་གནང་བའི་བཀའ་གསལ་པོ་གནང་བ་དང་དུས་མཚུངས་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་ནང་ཆེས་མཐོའི་རང་སྐྱོང་གི་འབད་བརྩོན་གནང་ཡོད། ཡིན་ནའི་ལོ་ངོ་སུམ་བཅུ་ལ་ཉེ་བའི་དུས་ཚོད་ནང་འགྱུར་བ་གང་ཡང་ཕྱིན་མེད་པའི་དབང་གིས་ད་ཆ་ལོ་རྒྱུས་ཀྱི་འགག་རྩའི་དུས་སྐབས་འདིར་རང་བཙན་གྱི་ལམ་ཐོག་བསྐྱར་དུ་ཕྱིར་ལོག་བྱེད་དགོས་ཀྱི་ཡོད། རྒྱལ་སྤྱིའི་རྒྱབ་སྐྱོར་འདི་དགོས་ངེས་ཞིག་ཡིན་རུང་གལ་འགངས་ཆེ་ཤོས་ནི་བོད་མི་རང་ཉིད་ཀྱི་ངོས་ནས་ལས་འགན་འདི་ཁུར་དགོས་ཀྱི་ཡོད། མི་རིགས་གང་འདྲ་ཞིག་ཡིན་རུང་རང་བཙན་ལ་འབད་བརྩོན་བྱེད་པའི་རྒྱུད་རིམ་ནང་ཁྲག་དང་ཚེ་སྲོག་གི་རིན་ཐང་བཏང་དགོས་ཀྱི་ཡོད། ང་ཚོའི་ངོས་ནས་ཁྲག་དོན་བཅུག་འདོད་མེད་པ་ཡིན་རུང་འདི་ནི་ཐབས་ཤེས་མེད་པ་ཞིག་དང་འདི་ནས་གཡོལ་ཐབས་མེད་པ་ཞིག་རེད། དེར་རྟེན་བོད་ནང་གི་བོད་མི་ཚོས་མཐུན་སྒྲིལ་རྡོག་རྩ་གཅིག་སྒྲིལ་བྱས་ནས་དམིགས་ཡུལ་འདིའི་ཐོག་རང་སྲོག་བློས་བཏང་གི་གྲ་སྒྲིག་ཨང་གསར་བྱེད་དགོས།
རྒྱ་ནག་ཐོག་ཉམས་ཞིབ་བྱེད་མཁན་གྱི་ནུབ་ཕྱོགས་པའི་མཁས་དབང་ནས་ངོས་འཛིན་བྱས་པར། ཕྱོགས་གང་འདྲ་ཞིག་གི་ཐོག་ནས་བོད་ལ་ལྟས་པ་ཡིན་ནའི་མ་འོངས་པའི་དུས་ཚོད་འདི་ཧ་ཅང་གི་ཐབས་སྐྱོ་པོ་ཞིག་མཐོང་གི་འདུག་ཅེས་དང་། འོན་ཀྱང་བོད་པའི་གཞོན་སྐྱེས་ནས་འདིར་དགག་པ་རྒྱབ་དོན་ལ། དངོས་གནས་བྱས་ན་རྒྱ་ནག་གུང་ཁྲན་གཞུང་འདིས་སྟོབས་འབྱོར་ལྡན་པ་ཞིག་ཡིན་དོག་བྱས་པའི་འོག་ལ་ཉེན་ཁ་མང་པོ་ཞིག་སྦས་ནས་ཡོད་པ་འདིར་སྣང་ཆུང་ཤོར་བ་གཅིག་དང་། ཡང་བོད་པ་དང་བོད་ཀྱི་རིག་གཞུང་གི་སྐྱེ་འཕེལ་ནུས་པ་དང་གསར་སྐྲུན་གྱི་ནུས་པ་འདིར་སྣང་ཆུང་ཤོར་བ་ཞིག་རེད། བོད་ཀྱི་གནད་དོན་ནི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་སྒེར་གྱི་གནད་དོན་ཞིག་མ་ཡིན་པས་ཉིན་ཞིག་༧གོང་ས་མཆོག་དགོངས་པ་ཆོས་དབྱིངས་སུ་ཕེབས་པའི་སྐབས་དེར་བོད་པ་དང་བོད་པའི་རིག་གཞུང་གི་སྐྱེ་འཕེལ་ནུས་པ་དང་གསར་སྐྲུན་གྱི་ནུས་པ་འདི་མེད་པ་ཆགས་རྒྱུ་མ་ཡིན་པས་༧གོང་ས་མཆོག་བསྐྱར་དུ་ཡང་སྲིད་ཕེབས་རྒྱུའི་ཞལ་བཞེས་གནང་ཡོད་པ་དང་བོད་མི་ཚོས་ཀྱང་ནང་ཆོས་ཀྱི་བསམ་པའི་སྙིང་བཅུད་འདུས་པའི་བོད་ཀྱི་རིག་གཞུང་འདིའི་བསམ་པ་བཅོལ་ཡུལ་ཁྲོད་ནས་མུ་མཐུད་འབད་བརྩོན་བྱེད་རྒྱུ་རེད། གང་འདྲ་ཡིན་རུང་བོད་མི་ཚོས་འབད་བརྩོན་བྱེད་པའི་རང་དབང་གྱི་ལམ་བུ་འདི་དཀའ་སྡུག་ཚད་མེད་ཡོད་རུང་འདིས་མ་འོངས་པའི་དུས་ཚོད་དེ་ཧ་ཅང་གི་ཐབས་སྐྱོ་པོ་ཞིག་ཡིན་པ་མངོན་གྱི་མེད། ཐབས་སྐྱོ་རུ་སྐྱོ་རུ་ཕྱིན་པའི་དབང་དུ་བཏང་ན་ཡང་ང་ཚོ་བོད་པ་ཚོ་དེ་རྩིས་ཀྱི་ཕམ་ཉེས་ཀྱི་ཁྲོད་ནས་སྙིང་སྟོབས་ཆེ་རུ་འགྲོ་རྒྱུ་ཡིན་པ་རེད།
ཡང་དོན་ཕན་རྩ་བ་ནས་མེད་པའི་ལྟ་ཚུལ་ཞིག་ནི་ལམ་གང་འདྲ་ཞིག་གི་ཐོག་ལ་སྐྱོད་པ་ཡིན་རུང་། དབུ་མའི་ལམ་ཡིན་ན་ཡང་འདྲ། རང་བཙན་གྱི་ལམ་ཡིན་ན་ཡང་འདྲ། ལྟ་དུས་འདི་གཉིས་མིག་མདུན་གྱི་འདེམས་ཁ་ཡིན་པ་ལྟ་བུ་ཡོད། ཡིན་ནའི་ནུས་པ་ཐོན་རྒྱུ་མེད་པའི་འདེམས་ཁ་ཞིག་ཡིན་པ་རེད། གང་ཡིན་ཞུས་ན། རྒྱ་ནག་གི་དབང་འཛིན་འོག་ལམ་འདི་གཉིས་ཀ་སྐྱོད་ཐབས་དཀའ་བས་རང་བཞིན་གྱི་འགྱུར་བ་ལ་བསྟུན་རྒྱུ་རང་རེད།
གསན་མཁན་རྣམ་པ་ཚོ་དེ་རིང་གི་ལེ་ཚན་འདི་སྙན་སྒྲོན་ཞུ་མཚམས་འདིར་བཞག་གི་ཡིན། གོང་ཞུས་ཀྱི་ལེ་ཚན་འདི་རྩོམ་པ་རང་ཉིད་ཀྱི་གཟིགས་ཚུལ་ཡིན་པ་ལས་འདི་ག་ཨེ་ཤི་ཡ་རང་དབང་རླུང་འཕྲིན་ཁང་གི་ལྟ་བ་ཡིན་པས་ཁྱབ་ཀྱི་མེད་ལ་ང་ཚོའི་གསམ་མཁན་རྣམ་པ་ཚོས་ལེ་ཚན་འདི་གསན་པར་ཐུགས་བརྗེ་ཆེ་ཞུ་རྒྱུ་དང་ལེ་ཚན་འདི་ཕབ་སྒྱུར་དང་སྙན་སྒྲོན་ཞུ་མཁན་སྒྲོལ་དཀར་ཡིན།
Filed under: Uncategorized
