t1024-td.mp3 གསན་ན།
འོད་ཟེར་གྱི་གླེང་སྟེགས།
ཟླ་བ་གསུམ་པའི་ནང་འཛམ་གླིང་མི་དམངས་ཀྱིས་གངས་ལྗོངས་ས་མཐོའི་ས་གནས་ཁག་ནང་ཐོན་པའི་བོད་མིའི་ངོ་རྒོལ་འདི་རྣམས་དངོས་སུ་མཐོང་ཡོད་པ་དང༌། ཡང་བོད་ནང་གི་མང་ཚོགས་ཚོར་འདིའི་རྐྱེན་གྱིས་གཞུང་ཕྱོགས་ནས་དྲག་གནོན་ནན་པོ་བྱས་ཡོད་ལ། གྲངས་ཚད་གསལ་པོ་ཞུ་ཡག་མེད་པའི་ཐོག་འཛིན་བཟུང་ཁྲིམས་གཅོད་བྱས་པ་དང་དེ་བཞིན་མི་མི་ཉུང་བ་ཞིག་ལ་རྨས་སྐྱོན་ཕོག་པ་འདི་ནི་དངོས་གནས་མི་སྤྱོད་ཀྱི་གནོད་འཚེ་ཚབས་ཆེན་ཞིག་ཡིན་པ་རེད༌། དེའི་ནང་རྒྱ་ནག་གི་ཤེས་ལྡན་མི་སྣ་ཚུད་པའི་རྒྱལ་སྤྱིའི་ཐོག་གི་གཞུང་དྲང་བའི་མི་སྣ་ཚོས་ཐབས་ལམ་སྣ་ཚོགས་ཀྱི་ཐོག་ནས་ཡོངས་ཁྱབ་ཀྱི་གསལ་བསྒྲགས་སྤེལ་ཏེ་རྒྱ་ནག་གཞུང་གིས་བོད་ཀྱི་གནད་དོན་ཐོག་དོ་ནན་གྱི་ཐག་གཅོད་དགོས་པའི་འབོད་སྐུལ་ཞུས་པ་དང་རྒྱ་ནག་གཞུང་གིས་བོད་ཐོག་འཛིན་པའི་སྲིད་ཇུས་ལ་སྐྱོན་བརྗོད་དྲག་པོ་བྱས་ཡོད་པ་རེད། ལྷག་པར་དུ་འདིར་ཞུ་དགོས་པ་གཅིག་ལ་ཟླ་༣ཚེས་༢༧ཉིན་རྒྱལ་སྤྱིའི་ཐོག་སྐད་གྲགས་ཡོད་པའི་བོད་རིག་པའི་མཁས་དབང་དང་མཁས་པ་མི་སྣ་༧༥ཡི་ཐུན་མོང་གིས་རྒྱ་ནག་གི་སྲིད་འཛིན་ཧུའུ་ཇིང་ཐའོ་ལ་ཕྱག་བྲིས་ཞིག་ཕུལ་ཡོད་པས་ཡང་ཉིན་གསུམ་གྱི་ནང་འཛམ་གླིང་ས་ཕྱོགས་ཁག་ནང་གི་ཤེས་ཡོན་མི་སྣ༢༧༠ཡིས་འདིར་དང་ལེན་ཞུས་པ་མ་ཟད་མཚན་རྟགས་ཡང་བཀོད་ཡོད་པ་རེད།
ཚིག་འཐུང་ལ་ཚིག་སྦྱོར་སྙན་ཞིང་མཛེས་པའི་མཚན་རྟགས་བཀོད་པའི་ཡི་གེ་དེའི་ནང་འདི་འདྲ་ཞིག་འཁོད་ཡོད་པ་སྟེ། རིག་གནས་པ་ཞིག་གི་ངོས་ནས་ཞུས་ན་ང་ཚོས་བོད་ཀྱི་དཔལ་ཡོན་དར་བའི་རིག་གཞུང་འདིར་ཞིབ་འཇུག་བྱེད་ཡག་འདི་རིག་གཞུང་གཅིག་པོའི་བརྗོད་གཞིའི་སྟེང་ནས་མ་ཡིན་པར་དེ་བས་འདི་ནི་མི་ཚོགས་གཅིག་གི་དམིགས་བསལ་རིག་གཞུང་ཞིག་དང་གསོན་པར་མཐོང་རྒྱུ་ཡོད་པའི་ཉམས་ལེན་དངོས་ཞིག་ཡིན་པ་རེད་ལ། ཡང་འཛམ་གླིང་གི་དཔལ་ཡོན་དར་བའི་ནང་གི་རྩ་ཆེའི་ཁོངས་གཏོགས་གཅིག་ཡིན་པ་རེད། དེར་རྟེན་ང་ཚོས་དེ་ཉིད་དུ་ཐོན་པའི་གནས་སྟངས་འདིར་སེམས་ཚབས་ཧ་ཅང་ཆེན་པོ་འདུག ད་ལྟ་མིག་མདུན་ཐོན་པའི་བོད་ཀྱི་གནས་ཚུལ་དེ་ཚོས་ང་ཚོ་མུ་མཐུད་ཁ་ཁུ་སིམ་པོའི་ངང་སྡོད་ཐབས་བྲལ་སོང༌། ང་ཚོའི་ཆེད་ལས་ནི་བོད་ཀྱི་འདས་པ་དང་ད་ལྟའི་གནས་སྟངས། རིག་གཞུང་དང་སྤྱི་ཚོགས་སོགས་ལ་རྒྱུས་མངའ་ཤེས་རྟོགས་བྱེད་རྒྱུ་འདི་ཡིན་པས་ཉེ་ཆར་བྱུང་བའི་དོན་རྐྱེན་གྱི་འཕེལ་རིམ་ལ་ལྟས་ན་ང་ཚོས་ཤུགས་ངྲག་ཆེན་པོའི་ཐོག་ནས་ངོ་རྒོལ་གྱི་སྐད་སྒྲ་འདི་མ་སྟོན་རང་སྟོན་བྱུང་སོང་ཅེས་འཁོད་ཡོད།
མཚན་རྟོགས་བཀོད་རྒྱུའི་ལས་འགུལ་དེ་རིགས་སྤེལ་བ་དང་མཚན་རྟགས་བཀོད་ཡག་གི་ཡི་གེ་འདིར་མཚན་རྟགས་བཀོད་པར་བློ་སྟོབས་ཆེན་པོ་ཞིག་བཏོན་དགོས་ཀྱི་ཡོད། མཚན་རྟགས་བཀོད་མཁན་ཧ་ལམ་ཚང་མ་རྒྱ་ནག་གི་ཕྱི་ལ་ཡོད་པའི་འཛམ་གླིང་ས་ཕྱོགས་ཁག་ནས་ཡིན་ན་ཡང༌དབང་འཛིན་པས་རང་ཉིད་ཀྱི་ལག་པའི་ནང་ཡོད་པའི་མི་དམངས་ཚོར་ཁ་གཏད་བཅག་པ་ནང་བཞིན་ཁོང་ཚོ་གོ་རྒྱུ་ཚོར་རྒྱུ་མེད་པ་བཟོ་ཐུབ་རྒྱུ་མིན་ན་ཡང་རྫིག་ཉམས་དང་དངངས་སྐྲགས་སློང་ཐུབ་ཀྱི་ཡོད། གང་ལྟར་མཚན་རྟོགས་བཀོད་མཁན་ཚོའི་ལས་དོན་དང་རྒྱ་ནག་གི་དབང་འཛིན་འོག་གནས་པའི་བོད་ཀྱི་ས་གནས་ཁག་དབར་འབྲེལ་བར་དམ་གཟབ་ཡོད་པ་རེད། དེར་རྟེན་ཁོང་ཚོར་ཕོག་པའི་རྡུང་རྡེག་དང་བཏང་འཛིན་འདི་ཚང་མས་མཁྱེན་གསལ་རེད། དངོས་གནས་བྱས་ན་འདི་འདྲའི་ཉེན་ཁ་ནི་སྔ་ས་ནས་ཡོད་པས་དེར་རྟེན་མི་འགའ་རེས་རྟག་ཏུ་ལངས་ཕྱོགས་གསལ་པོ་མེད་པའི་རྣམ་པ་ཞིག་འཛིན་པ་མ་ཟད། ད་དུང་ལྷགས་ཕྱོགས་ལ་བསྟུན་ནས་གྲུ་བཏང་བ་བཞིན་འཚོ་ཐབས་བྱེད་མཁན་ཡོད་པ་རྒྱུན་དུ་ནས་མཐོང་རྒྱུ་ཡོད་པ་དེའི་ནང་ནས་ཁེ་ཕན་ལེན་པ་དང་ཡང་ན་རང་ཉིད་ཀྱི་ལས་ཀ་བྱེད་ཀྱི་ཡོད་པ་བརྗོད་ཀྱི་ཡོད། དགོད་དྲོ་ཤོས་ནི་བོད་ལ་རྒྱུས་མངའ་ཡོད་ཟེར་མཁན་ཡིན་ན་ཡང་འདྲ་ཡང་རྒྱ་ནག་ལ་རྒྱུས་མངའ་ཡོད་ཟེར་མཁན་ཡིན་ན་ཡང་འདྲ་མི་འགའ་རེས་རྒྱ་ནག་གི་དབང་སྡེམ་རང་གཤིས་འདིར་རྒྱུས་མངའ་ཡོད་པ་རང་བསྟོད་བྱས་ནས་སྲིད་གཞུང་འདི་གཡོ་སྒྱུ་ཚ་ཞིང་ཚོད་མི་ཐིག་པ་ཞིག་དང་འགྱུར་ལྡོག་ཆེ་བའི་ཕྲུ་གུ་ནང་བཞིན་ཞིག་ལ་དཔེ་བཞག་ནས་ལུས་པོའི་ནུས་ཤུགས་ཡོད་ཚད་འདོན་ཏེ་བྱེད་ཐབས་སྣ་ཚོགས་ཀྱི་སྟེང་ནས་སྲིད་གཞུང་འདིར་མགོ་སྐོར་ཏེ་ཁ་ཏ་བསླབ་བྱ་བྱེད་དགོས་ཀྱི་ཡོད་པར་ངོས་འཛིན་བྱས་པའི་ཐོག་གཤིས་བརྒྱུད་ཡག་པོ་ཞིག་རྒྱུན་མཁྱོངས་བྱེད་ཐུབ་པའི་ཐབས་ལམ་ཀྱི་ཁྲོད་ནས་འདི་ལྟ་བུའི་རང་ཉིད་ཀྱི་དམིགས་ཡུལ་གྲུབ་ཐུབ་པ་དང་རང་ཉིད་ལ་ཁེ་ཕན་རགས་ཐུབ་པ་བྱེད་ཀྱི་ཡོད། དངོས་གནས་ཞུས་ན་འདིས་ཁ་གཏད་ལ་དྲེགས་ཉམས་ཆེན་པོ་ཞིག་མིན་པར་དེ་ལས་ལྡོག་སྟེ་རང་ཉིད་ལ་དམའ་འབེབས་བྱས་པ་རང་རེད།
ཉེ་ཆར་པེ་ཅིང་ལ་སྐབས་བཞི་པའི་བོད་རིག་པའི་དཔྱད་གླེང་གྲོས་ཚོགས་འདི་སྐོང་ཚོགས་བྱས་ཡོད་པ་དང༌། གཙོ་གཉེར་བྱེད་མཁན་ནི་རྒྱ་ནག་གི་བོད་དང་འབྲེལ་ཡོད་ཀྱི་གནད་དོན་ཐོག་མགྲིན་ཚབ་པ་དོན་མཁན་ནས་ཚོགས་འདུའི་སྒོ་ཚུགས་མཛད་སྒོའི་ཐོག་རྒྱལ་སྤྱིའི་བོད་རིག་པའི་མཁས་དབང་དང་མཁས་པ་ཁག་འདིར་ཕེབས་པར་དགའ་བསུ་ཞུ་རྒྱུ་ཡིན་པ་བརྗོད་ཡོད། རྒྱ་ནག་གི་བོད་དང་འབྲེལ་བའི་དྲ་རྒྱའི་ཐོག་ནས་ཤེས་རྟོགས་བྱུང་བར། ཚོགས་འདུར་ཕེབས་མཁན་ནང་རྒྱལ་ཁབ་༡༦གི་མཁས་པ་༤༦ཡོད་པ་དང་ཧོང་ཀོང་དང་ཐེ་ཝན་ནས་མཁས་པ་༡༡མཉམ་བཞུགས་བྱས་ཡོད་པ། ཡང་པེ་ཅིང་དང་ཞིང་ཆེན་ལྔའི་བོད་ཀྱི་ས་ཁུལ་ནས་མཁས་པ་༡༦༣མཉམ་བཞུགས་གནང་ཡོད་པ་རེད་འདུག གུས་མོས་ཤེས་རྟོགས་བྱུང་བར། ད་རེས་གདན་ཞུ་བྱས་པའི་རྒྱལ་སྤྱིའི་བོད་རིག་པའི་མཁས་དབང་དང་མཁས་པའི་ཁོངས་སུ་ཟླ་བ་གསུམ་པའི་ནང་མཚན་རྟགས་བཀོད་མྱོང་ཡོད་པའི་མི་སྣ་གཅིག་ཀྱང་གདན་ཞུས་བྱས་མེད་པ་དང༌། སྔ་ས་ནས་གདན་ཞུ་བྱས་ཚར་བ་དང་ཡང་ན་གདན་ཞུ་བྱ་རྩིས་ཡོད་པ་ཚོ་ཡང་གནད་དོན་དེས་རྐྱེན་པས་གདན་ཞུ་ཁག་ཕྱིར་འཐེན་བྱས་ཡོད་པ་རེད། རྒྱལ་ནང་གི་ཚོགས་འདུར་མཉམ་བཞུགས་བྱེད་མཁན་བོད་རྒྱ་མི་རིགས་ཀྱི་མཁས་དབང་དང་མཁས་པ་ཁྱོན་༡༦༣ཡོད་པ་ཚོ་བརྗིད་རྔམ་ཆེན་དོག་ཡོད་པ་ཡིན་རུང༌། འདི་ལོ་ཟླ་བ་གསུམ་པའི་ནང་འདི་ལྟ་བུའི་རྒྱལ་རབས་ལོ་རྒྱུས་ཀྱི་དོན་རྐྱེན་ཐོན་ཡོད་པའི་ཁྲོད་ཚང་མས་སྐད་སྒྲ་གང་ཡང་སྟོན་མེད་པ་དང་བྱིན་ཆགས་པ་ཞིག་མིན་འདུག་ཟེར་ན་མི་ཆོག་པ་དང་ཡང་མི་ཚོས་འདིར་བློ་ཕམ་ཡོང་གི་མ་རེད་ཟེར་ན་ཡང་ཆོག་གི་མེད། དེའི་ཁྲོད་ནས་རྟག་རྟག་དབང་སྡེམ་པས་བསྡུ་ལེན་དང་བཅོས་སྒྲིག དེ་བཞིན་དབང་སྡེམ་པའི་གཡོག་པོ་ཞིག་བྱེད་ཀྱི་ཡོད་པའི་དངོས་ཡོད་གནས་ཚུལ་འདི་གསལ་པོ་མངོན་གྱི་ཡོད་པ་རེད།
ཟླ་བ་བདུན་ཙམ་ཕྱིན་ཚར་བའི་ས་ཡིག་འཁོད་པའི་ཡི་གེ་འདིར་བསྐྱར་དུ་བསམ་བློ་བཏང་སྐབས་སེམས་གཏིང་ནས་འདི་ནི་རིན་ཐང་ཧ་ཅང་ཆེན་པོ་ཡོད་པ་ཞིག་ཡིན་པ་ཚོར་གྱི་འདུག དབྱིན་ཇིའི་རྩོམ་པ་པོ་ཝང་འརདའ་ནས་འདི་འདྲ་ཞིག་གསུང་མྱོང་ཡོད་པ་སྟེ། མི་ཆོས་ལ་ནན་འཛིན་མི་བྱེད་མཁན་གྱིས་གནད་དོན་རེ་རེའི་རིན་གོང་འདི་ཤེས་པ་ལས་གནད་དོན་གཅིག་གི་རིན་ཐང་འདི་ཤེས་ཀྱི་མེད་པ་རེད་ཟེར་བ་འདི་དང༌ཡང་དེང་སྐབས་ཀྱི་མི་ཚུལ་རིང་ལུགས་ཀྱི་མཁས་དབང་ཟཡིརྡ་ནས་གསུང་པར། དམིགས་བསལ་གྱི་ལས་འགན་ཞིག་གི་ཐོག་ནས་རང་ཉིད་ཀྱི་སྤྱི་ཚོགས་ཐོག་ནས་ཆགས་པ་ཞིག་དང་དབང་ཆ་སྤྲད་ཡུལ་གྱི་དབང་ཤུགས་འདིར་སྐད་ཆ་བཤད་དགོས་པར་ངས་ཡིད་ཆེས་བྱེད་ཀྱི་ཡོད། གང་ཡིན་ཞུས་ན། དབང་ཤུགས་འདི་ཚོས་ངེས་པར་དུ་སྤྱི་ཚོགས་ཀྱི་སྤྱི་འབངས་ལ་གསལ་བཤད་གཅིག་དགོས་པ་དང་ལྷག་པར་དུ་དབང་ཤུགས་འདི་ཚོ་མངོན་གསལ་དོད་པོས་འོས་མཚམས་མེད་པ་དང་སྤྱོད་ངན་གྱི་དམག་འཁྲུག་ནང་བེད་སྤྱོད་བཏང་བ། ཡང་ན་མཐོང་ཆུང་དང་གཉའ་གནོན། དེ་བཞིན་མཉམ་རུབ་ཀྱི་ཡ་ང་སྙིང་རྗེ་མེད་པའི་བསམ་ངན་ཁོག་བཅངས་ཀྱི་ཐོག་བེད་སྤྱོད་བཏང་གི་ཡོད་ཅེས་བརྗོད་མྱོང་། མིང་དོན་མཚུངས་པའི་ཤེས་ཡོན་ཅན་ཞིག་ཡིན་ན་དུས་དང་རྣམ་པ་ཀུན་ཏུ་དབང་ཤུགས་ཀྱི་ཁ་གཏད་དུ་ལངས་རྒྱུ་ཡིན་པ་དང་ལྷག་པར་དུ་ཁ་ལོ་སྒྱུར་མི་ཐུབ་པའི་དབང་འཛིན་སྲིད་གཞུང་གི་ཁ་གཏད་ལ་ལངས་རྒྱུ་ཡིན་པ་རེད། རང་ཉིད་ཀྱི་དད་སེམས་འདིར་དམིགས་ནས་སྐད་སྒྲ་སྟོན་ནས་དབང་ཤུགས་ཕྱོགས་ལ་དངོས་ཡོད་གནས་ཚུལ་བརྗོད་དགོས་པ་ལས་དབང་ཤུགས་ཀྱི་ཕྱོགས་ནས་འཇམ་རྩུབ་སྣ་ཚོགས་བེད་སྤྱད་དེ་གནོན་ཤུགས་སྤྲད་པ་འདིར་མགོ་བོ་སྒུར་པ་དང་བཤད་ཚད་ཉན་པ་སོགས་བྱེད་རྒྱུ་མེད། དེས་མིན་ན་ཁ་ཁུ་སིམ་པར་ངག་བསྡམས་པ་དང་ངན་པར་རོགས་སྡེབ་བྱས་པ་རང་རེད།
དེར་རྟེན་ཟླ་བ་གསུམ་པའི་ནང་གཟི་བརྗིད་ཆེ་བའི་མི་སྤྱོད་རིང་ལུགས་ཀྱི་སྙིང་སྟོབས་བཅངས་ཏེ་དཀའ་སྡུག་མྱོང་བཞིན་ཡོད་པའི་བོད་མི་ཚོའི་ཆེད་དབང་སྡེམ་པར་བློ་སྟོབས་ཆེན་པོའི་སྐད་སྒྲ་སྟོན་མཁན་གྱི་གཞུང་དྲང་བའི་བོད་རིག་པའི་མཁས་དབང་དང་མཁས་པ་རྣམས་ལ་བླ་ན་མེད་པའི་གུས་བཀུར་ཞུ་རྒྱུ་ཡིན།
གསན་མཁན་རྣམ་པ་ཚོ་དེ་རིང་གི་ལེ་ཚན་འདི་སྙན་སྒྲོན་ཞུ་མཚམས་འདིར་བཞག་གི་ཡིན། གོང་ཞུས་ཀྱི་ལེ་ཚན་འདི་རྩོམ་པ་རང་ཉིད་ཀྱི་གཟིགས་ཚུལ་ཡིན་པ་ལས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གི་ལྟ་བ་ཡིན་པས་ཁྱབ་ཀྱི་མེད་ལ་ང་ཚོའི་གསམ་མཁན་རྣམ་པ་ཚོས་ལེ་ཚན་འདི་གསན་པར་ཐུགས་བརྗེ་ཆེ་ཞུ་རྒྱུ་དང་ལེ་ཚན་འདི་ཕབ་སྒྱུར་དང་སྙན་སྒྲོན་ཞུ་མཁན་སྒྲོལ་དཀར་ཡིན།
གོང་གི་འདྲ་པར་འདི་རྣམས་བོད་ལྗོངས་ཆ་འཕྲིན་དྲ་གནས་ནས་ལེན།
Filed under: Uncategorized
