ལྷ་ས་བ་ཚོས་ཇ་མངར་མོར་འཐུང་རྒྱུར་ཧ་ཅང་དགའ་པོ་ཡོད་པ་མ་ཟད། ཐ་ན་དབྱིངས་ཞུགས་པའི་གནས་སུ་གྱར་ཡོད། ལྷ་སའི་ཁྲོམ་གཞུང་དང་སྲང་ལམ་ཚང་མའི་ནང་ཇ་ཁང་ག་ཚོད་ཙམ་ཡོད་མིན་གྲངས་ཀ་རྒྱབ་ཚོད་མེད་པ་རེད། སྐད་གྲགས་ཡོད་པའི་ཇ་ཁང་ལ་ཆ་མཚོན་ན། དཔེར་ན་རྫས་སྤྲོད་དང་གྷ་རྨིང་། སྒམ་ཆུང༌། ལུག་ཚང་སོགས་ལྷ་སའི་ནང་སྐད་གྲགས་ཡོད་པས་ཉིན་ལྟར་བོད་མི་རྒན་གཞོན་མང་པོ་ཇ་ཁང་འདི་ཚོའི་ནང་འཛོམས་ཀྱི་ཡོད། ཡང་དགོན་པའི་ཉེ་འཁོར་ལ་ཡང་ཇ་ཁང་ཡོད་པས་ཟླ་བ་གསུམ་པའི་སྔོན་ཆོས་མཇལ་ཞུ་བར་བཅར་མཁན་དང་དགེ་འདུན་ཚོ་ཇ་ཁང་ནང་ཁེངས་ནས་ཡོད་པ་མ་ཟད། ད་དུང་ཇ་ཁང་ཚང་མའི་ནང་སྤྲང་པོ་ཚོས་ལག་པ་རྐྱང་ནས་དངུལ་སློང་མཁན་ཡང་ཡོད་པ་རེད། 
ཇ་མངར་མོའི་རིན་གོང་ཞུས་ན་དེ་སྔོན་དཀར་ཡོལ་གང་ལ་སྒོར་ཟུར་གཉིས་ཡིན་པ་དང་། ད་ཆ་དཀར་ཡོལ་གང་ལ་སྒོར་ཟུར་ལྔ་བྱེད་ཀྱི་ཡོད། ཇ་མངར་མོ་བླུགས་སའི་ཤེར་གྱི་དཀར་ཡོལ་འདི་ཆུང་རུ་ཕྱིན་པ་ལྟ་བུ་འདུག ཡིན་ནའི་རིན་གོང་མུ་མཐུད་ཕར་བཞིན་ཡོད། ཇ་མངར་མོ་འཐུང་མཁན་གྱི་མི་ཧ་ཅང་མང་པོ་ཡོད་པས་ཞབས་ཞུ་བ་ཚོས་ཤེར་གྱི་དཀར་ཡོལ་རེ་རེ་བཞིན་ཇ་མངར་མོ་བླུགས་སྐབས་བྲེལ་ཚུབ་ཆེན་པོ་བྱེད་དགོས་ཀྱི་ཡོད། དེར་རྟེན་ད་ཆ་ཇ་དམ་བེད་སྤྱོད་བྱེད་ཡག་དར་བཞིན་འདུག ཆེ་ཆུང་འདྲ་མིན་གྱི་ཇ་དམ་སྣ་ཁ་ཁག་གཅིག་ཡོད་པའི་ནང་ཇ་དམ་འབྲིང་ཙམ་ལ་རིན་གོང་རྒྱ་སྒོར་གསུམ་ནས་རྒྱ་སྒོར་བདུན་ལ་ཕར་ཡོད།
རང་ཉིད་ཀྱི་ཁྱིམ་ཚང་ལ་ཇ་མངར་མོ་བཟོ་ཡི་ཡོད་པ་དང་དང་འདོད་བྱེད་མཁན་ཚོས་པ་ཏི་བསྐོལ་པའི་ནང་འོ་མ་གསོལ་པ་བླུགས་ཀྱི་ཡོད། ཡིན་ནའི་ཡག་ཤོས་ནི་ས་གནས་ཀྱི་ཞིང་པའི་འོ་མ་སོས་པ་འདི་ཡིན་པ་རེད། སྤྱི་བཏང་ཚང་མས་བེད་སྤྱོད་བྱེད་ཡག་ནི་ཚོང་ཁང་ནས་ཉོས་པའི་འོ་མ་ཡིན་པ་དང་། འོ་མ་དེ་ཚོའི་མིང་ལ་ཡིས་ལིད་ཟེར་བ་དང་མང་ཉུའུ་ཟེར་གྱི་ཡོད་ལ། སྒམ་ཆུང་གཅིག་གི་གོང་ཚད་འདི་རྒྱ་ནག་ནང་ལས་རིན་གོང་མཐོ་བ་ཡོད། ཡང་འོ་མའི་མིང་ལ་ཐེ་ལུན་སུའུ་ཟེར་བ་འདི་ལྷ་སར་པེ་ཅིང་ལས་སྒོར་ལྔ་དྲུག་གི་རིན་གོང་མཐོ་བ་ཡོད་ན་ཡང་འོས་ཤིང་འཚམས་པ་ལྟ་བུ་བྱེད་ཀྱི་ཡོད། ད་དུང་འོ་རྩམ་བསྲེས་མཁན་ཡོད་པ་དང་དེ་ཚོ་ཡང་ཚོང་ཁང་ནས་ཉོ་པའི་འོ་རྩམ་རེད། དཔལ་འབྱོར་གྱི་གནས་སྟངས་སྐྱོ་པོ་ཡོད་མཁན་ཚོ་ཚང་མ་ཁྲོམ་གཟིགས་ཁང་གི་སྡེབ་འཚོང་ཁང་ལ་སྐྱོད་ནས་འོ་རྩམ་ཉོ་གི་ཡོད།
ཡང་ཇ་ཁང་ཚང་མས་ཕལ་ཆེར་ཁྲོམ་གཟིགས་ཁང་གི་སྡེབ་འཚོང་ཁང་ནས་འོ་རྩམ་ཉོ་གི་ཡོད་ས་རེད། འོ་རྩམ་དེ་རིགས་ཚང་མ་བརྙན་འཕྲིན་དང་ཚགས་པར་ཐོག་ནས་དྲིལ་བསྒྲགས་བྱས་པ་རྩ་བ་ནས་མཐོང་རྒྱུ་མེད། བཟོ་གྲྭ་ཧ་ལམ་ཚང་མ་ཧྲན་ཤི་དང་ཀན་སུའུ་ནས་ཡིན་པས་རིན་གོང་ཡང་ཆུང་བ་ཡོད། དེ་སྔོན་གུས་མོ་རྫས་སྤྲོད་ཟ་ཁང་ལ་ཇ་མངར་མོ་འཐུང་བར་སྐྱོད་སྐབས་གཞི་རྒྱ་ཆེ་ཞིང་ཚ་ཚ་འུར་འུར་གྱི་ཐབ་ཚང་ལ་ལྟ་སྐོར་དུ་སྐྱོད་མྱོང་ཡོད། ཐབ་ཚང་ནང་འོ་རྩམ་བླུགས་ཆེད་ཀྱི་སྣོད་འདི་ཚོ་རྩིས་ནས་རི་ཆུང་ཆུང་ལྟ་བུ་ཞིག་ཆགས་བཞག ཡང་སྣོད་འདི་ཚོ་ཉིན་ཕྱེད་ཀའི་ནང་བེད་སྤྱོད་བྱས་པའི་འོ་རྩམ་ཡིན་པས་ཉིན་གཅིག་ལ་འོ་རྩམ་དེ་རིགས་ག་ཚོད་ཙམ་ཞིག་བེད་སྤྱོད་བཏང་ནས་ཇ་མངར་མོ་བཟོ་གི་ཡོད་པ་ཡིན་ནམ།
ཉེ་ཆར་རྒྱ་ནག་གི་ས་གནས་ཁག་ཚང་མའི་ནང་མིང་ལ་སན་ཀླུའུ་འོ་རྩམ་ཟེར་བ་འདིས་གྲངས་ལས་འདས་པའི་ཕྲུ་གུ་ཆུང་ཆུང་ཚོའི་ལུས་པོར་ན་ཚ་བཟོས་ནས་གཡོ་འགུལ་ཆེན་པོ་ཞིག་ཐེབས་བཞིན་ཡོད་པ་དང་། དེ་རྗེས་བསྟུད་མར་ཡང་འོ་རྩམ་རིགས་མི་འདྲ་བ་ཉི་ཤུ་ལྷག་ཙམ་ཞིག་ལ་དུག་རྫས་ཡོད་པའི་འོ་རྩམ་ཡིན་པ་རྩད་གཅོད་ཐུབ་ཡོད། ཐ་ན་ཡིས་ལིད་དང་མང་ཉུའུ་སོགས་སྐད་གྲགས་ཡོད་པའི་འོ་མས་བཟོས་པའི་བཟའ་རིགས་ལ་ཡང་གནས་ཚུལ་ཡོད་པ་རེད་འདུག ལྷ་སའི་ཇ་ཁང་ནང་ཉིན་ལྟར་སྐད་གྲགས་མེད་པའི་བཟོ་གྲྭ་ཆུང་ཆུང་དང་ཐ་ན་མཐུན་རྐྱེན་མ་ཚང་བའི་ཐོག་བཟོས་པའི་རིན་གོང་དམའ་བའི་འོ་རྩམ་ཕོན་ཆེན་ཞིག་བེད་སྤྱོད་བྱེད་བཞིན་ཡོད་པ་དྲན་དུས་འོ་རྩམ་དེ་ཚོར་ཡང་གནས་ཚུལ་གཏན་གཏན་ཡོད་ཀྱི་རེད། འོ་རྩམ་དེ་ཚོ་སན་ལུའུ་འོ་རྩམ་ལས་དེ་བས་སྤུས་ཁ་ཞན་པ་ཡོད་སྲིད་ཀྱི་རེད། ཡང་འོ་རྩམ་དེ་རིགས་པེ་ཅིང་ལ་མཐོང་རྒྱུ་མེད་ལ་གྲན་རྡུར་ཡང་མཐོང་རྒྱུ་མེད། ཡིན་ནའི་ལྷ་ས་ལ་གང་སར་ཡོད་པ་མ་ཟད། ད་དུང་ཇ་མངར་མོ་མཐོང་རྒྱུར་ཧ་ཅང་གི་དགའ་པོ་ཡོད་པའི་གྲངས་ལས་འདས་པའི་ལྷ་ས་བ་ཚོས་འཐུང་གི་ཡོད་པས་འདིའི་ཁྲོད་ནས་མཐའ་འབྲས་གང་འདྲ་ཞིག་ཡོང་གི་རེད་དམ། གུས་མོས་ལྷ་སར་ཡོད་པའི་གྲོགས་པོ་དང་ལྷན་དུ་གནད་དོན་འདིའི་ཐོག་བགྲོ་གླེང་ཞུས་པ་ཡིན། ངས་ལྷ་སར་མི་ག་ཚོད་ཙམ་ལ་མཁལ་མའི་ནད་གཞི་ཕོག་ཡོད་དམ་ཅེས་འདྲི་སྐབས་ཁོང་གིས་མི་ཧ་ཅང་མང་པོ་རེད། ངའི་གཅུང་པོ་འདི་ལོ་ནད་གཞི་འདི་ཕོག་པ་རེད་ཅེས་གསུང་བྱུང་བ་དང་། ཡང་གུས་མོས་ཁོང་ཇ་ཁང་ལ་སྐྱོད་ཀྱི་རེད་དམ་ཞུ་སྐབས་ཁོང་གིས་ཉིན་ལྟར་འགྲོ་གི་རེད་གསུང་བྱུང༌། ཡང་གུས་མོས་དངོས་གནས་རྟགས་དཔྱད་བྱེད་དགོས་ངེས་རེད། ལྷ་སར་མཁལ་མའི་ནད་གཞི་ཕོག་པའི་མི་ག་ཚོད་ཡོད་དམ། བོད་ཀྱི་ཞིང་འབྲོག་ས་ཁུལ་ལ་ཕལ་ཆེར་དུག་རྫས་ཡོད་པའི་འོ་རྩམ་ཡོད་ཀྱི་མ་རེད། གང་ཡིན་ཞུས་ན་ཞིང་པ་འབྲོག་པ་རང་ཉིད་ཀྱི་ཁྱིམ་ཚང་ལ་བ་ཕྱུགས་གསོས་ཡོད་པ་དང་ཇ་མངར་མོ་ཡང་འཐུང་གི་མ་རེད། དུག་རྫས་ཡོད་པའི་འོ་རྩམ་གྱིས་ཕྲུ་གུ་ཆུང་ཆུང་ལ་ནད་གཞི་ཕོག་པ་ཡོད་སྲིད་ཀྱི་མ་རེད་ཅེས་ཞུ་སྐབས་གྲོགས་པོ་ཁོང་གིས་སུས་བྱེད་ནུས་ཀྱི་རེད་དམ། གནས་ཚུལ་དངོས་འདི་གཅིག་བྱས་ན་དེ་ལས་འཇིགས་སྣང་ཆེ་བ་ཡོད་སྲིད་ཀྱི་རེད་གསུང་བྱུང་།
ཡིན་ནའི་རྒྱ་ཆེའི་ཞིང་འབྲོག་ཁུལ་ལ་དེ་དང་འདྲ་བར་དེ་མིན་གྱི་དངོས་ཟོག་རྫུན་མས་ཁེངས་ནས་ཡོད་པ་རེད། དཔེར་ན་ཆུ་མངར་མོ་འདྲ་མིན་དང་ཁ་ཟས། སྟབས་བདེའི་ཐུག་པ། བྱི་རིལ་སོགས་མང་པོ་ཡོད། རྟག་ཏུ་དུས་ཆེན་ཆེ་ཁག་ལ་སླེབས་དུས་དཔེར་ན་རྟ་རྒྱུགས་དུས་ཆེན་སྐབས་གྲངས་ལས་འདས་པའི་སིལ་འཚོང་བ་མང་པོ་འཁོར་ནས་ཁོང་ཚོས་དངོས་ཟོག་རྫུན་མ་མང་པོ་འཁྱེར་ཏེ་ཚོང་རྒྱག་གི་ཡོད། གུས་མོས་ཐེངས་མང་མཐོང་མྱོང་ཡོད་ལ། ཚོང་ཟོག་དེ་རིགས་རྩ་བ་ནས་གོ་མྱོང་མེད་པ་དང་། ད་དུང་རྟག་ཏུ་དུས་ཚོད་ཡོལ་བ་ཤ་སྟག་ཡིན་པ་རེད། རྒྱ་ཆེའི་བོད་ཀྱི་ས་གནས་ཁག་དངོས་ཟོག་རྫུན་མ་ཕམ་ཚོང་རྒྱག་ས་ཞིག་ཆགས་པ་མ་རེད་དམ།
བོད་ཁུལ་གྱི་ས་གནས་ཁག་གི་སྲིད་གཞུང་གི་སྤུས་ཚད་ཞིབ་བཤེར་ཚན་པ་ནས་དོན་ངོ་མའི་འགན་ཁུར་བྱས་ཏེ་ཁྲོམ་རྭའི་ཐོག་གི་དངོས་ཟོག་རྫུན་མ་མཐོང་ཐེངས་རེར་གཞུང་བཞེས་རེ་བཏང་ཐུབ་པའི་རེ་བ་བྱེད་ཀྱི་ཡོད་ལ། ཡང་བོད་ཁུལ་གྱི་གཞོན་སྐྱེས་ཚོས་ཁྲོམ་རྭའི་སྟེང་ཡོད་པའི་གཟུགས་གཞིའི་འཕྲོད་བསྟེན་ལ་གནོད་འཚེ་བཏང་མཁན་གྱི་དངོས་ཟོག་རྫུན་མ་འདི་ཚོ་འདུ་རུབ་བྱས་པ་དང་དངོས་ཟོག་རྫུན་མ་དེ་རིགས་ཀྱིས་ན་ཚ་བཟོས་ཡོད་མིན་རྟགས་དཔྱད་བྱས་པ། བོད་མི་རུབ་སྡོད་བྱེད་ཡུལ་དང་དེ་བཞིན་ཞིང་འབྲོག་ས་ཁུལ་ལ་དངོས་ཟོག་རྫུན་མའི་ཉེན་ཁའི་རང་བཞིན་འདི་རྣམས་ངོ་སྤྲོད་བྱས་ནས་རྒྱ་ཆེའི་བོད་མི་རྣམས་ཀྱིས་ཤེས་པ་བཟོ་ཐུབ་པའི་རེ་བྱེད་ ཀྱི་ཡོད། དོན་དངོས་ཐོག་ཁྲ་ཁྲ་སིལ་སིལ་གྱི་དངོས་ཟོག་གསར་པ་འདི་ཚོ་གཅིག་བྱས་ན་ཚེ་སྲོག་ལ་གནོད་འཚེ་གཏོང་བའི་དུག་རིགས་ཡིན་སྲིད་ཀྱི་རེད།
གསན་མཁན་རྣམ་པ་ཚོ་དེ་རིང་གི་ལེ་ཚན་འདི་སྙན་སྒྲོན་ཞུ་མཚམས་འདིར་བཞག་གི་ཡིན། གོང་ཞུས་ཀྱི་ལེ་ཚན་འདི་རྩོམ་པ་རང་ཉིད་ཀྱི་གཟིགས་ཚུལ་ཡིན་པ་ལས་འདི་ག་རླུང་འཕྲིན་ཁང་གི་ལྟ་བ་ཡིན་པས་ཁྱབ་ཀྱི་མེད་ལ་ང་ཚོའི་གསམ་མཁན་རྣམ་པ་ཚོས་ལེ་ཚན་འདི་གསན་པར་ཐུགས་བརྗེ་ཆེ་ཞུ་རྒྱུ་དང་ལེ་ཚན་འདི་ཕབ་སྒྱུར་དང་སྙན་སྒྲོན་ཞུ་མཁན་སྒྲོལ་དཀར་ཡིན།(བོད་ཀྱི་རྩོམ་པ་པོ་འོད་ཟེར་ལགས་ནས་ཨེ་ཤི་ཡ་རང་དབང་རླུང་འཕྲིན་ཁང་གི་ལེ་ཚན་ལ་ཆེད་རྩོམ་གནང་བ།)
Filed under: Uncategorized
Tashi Delek!