དེ་རིང་གི་ཉིན་མོ།

༡༩༤༧ལོའི་ཟླ་༡༠ཚེས་༢༧ཉིན་རྒྱ་གར་དང་པ་ཀི་སི་ཐན་དབར་ཁའར་ཤི་མིར་ཡའི་བདག་དབང་གི་གནད་དོན་ལས་དྲག་པོའི་གདོང་ཐུག་བྱུང་བ་རེད། ༡༩༠༤ལོའི་ཟླ་༡༠ཚེས་༢༧ཉིན་ཨ་རིའི་ནིའུ་ཡོག་གྲོང་ཁྱེར་ལ་ས་འོག་རི་ལིའི་ལྕགས་ལམ་དབྱིན་ལི་དགུ་ཙམ་ཞིག་བཟོ་སྐྲུན་ཟིན་པའི་རྟེན་འབྲེལ་བྱས་ཤིང་ལྕགས་ལམ་བཟོ་སྐྲུན་ལས་འགོ་དེ་༡༩༠༠ལོའི་ཟླ་བ་གསུམ་པར་འགོ་བཙུགས་པ་རེད། (འཇམ་དཔལ་ཕུན་ཚོགས་ལགས་ཀྱིས་ཕྱོགས་སྒྲིག་གནང༌།)

དེ་རིང་གི་ཉིན་མོ།

༡༩༤༥ལོའི་ཟླ་༡༠ཚེས་༢༤ཉིན་མཉམ་སྦྲེལ་གྱི་རྩ་ཁྲིམས་ལས་རྒྱལ་ཁབ་༢༦ལ་ཆོག་མཆན་བཀོད་པར་རྒྱལ་ཚོགས་ཀྱི་རྩ་ཁྲིམས་ལ་ནུས་པ་ཐོན་པ་དང་མཉམ་སྦྲེལ་རྒྱལ་ཚོགས་དངུས་སུ་བརྙེས།(འཇམ་དཔལ་ཕུན་ཚོགས་ལགས་ཀྱིས་ཕྱོགས་སྒྲིག་གནང༌།)

ཁྲིམས་ལུགས་སློབ་གསོ་ཟེར་བ་འདིའི་རྒྱབ་ཕྱོགས་ལ་གཏོར་བཤིག་བཏང་ཡག་འདི་ནང་ཆོས་ཀྱི་ལམ་སྲོལ་ཡིན་པ་རེད།

t1017-td.mp3གསན་ན། འོད་ཟེར་གྱི་གླེང་སྟེགས། ཟླ་བ་གསུམ་པ་ནས་བཟུང་རྒྱ་ནག་གཞུང་ཕྱོགས་ཀྱིས་བོད་ཀྱི་ས་གནས་ཁག་ནང་ཡོད་པའི་དགོན་སྡེ་ཁག་ནང་ལོ་མང་རིང་སྤེལ་བཞིན་ཡོད་པའི་རྒྱལ་གཅེས་རིང་ལུགས་ཀྱི་སློབ་གསོ་ཟེར་བ་འདིའི་མིང་ལ་སྒྱུར་ལ་བཏང་ནས་ཁྲིམས་ལུགས་སློབ་གསོ་ཟེར་བ་ཞིག་སྤེལ་འགོ་ཚུགས་ཡོད། བོད་ཀྱི་ས་གནས་ཁག་ནང་རྩོམ་སྒྲིག་དང་ཕབ་སྒྱུར་བྱས་པའི་བོད་ཡིག་སློབ་དེབ་༥༦ཡོད་པ་འདི་རྣམས་དགོན་པ་ཁག་ནང་བཀྲམ་ཡོད། ནང་དོན་ནི་རྒྱ་ནག་གི་ཁྲིམས་ལུགས་ཁྲིམས་སྲོལ་དང་གསུམ་གཅིག་བཞིའི་དོན་རྐྱེན་འདིར་ས་གནས་ནི་བལྟ་ཚུལ་ཇི་ཡོད་སོགས་ཡིན་པ་རེད། ཉེན་རྟོག་པ་དང་ཚན་པ་སོ་སོ་ནས་འདེམས་སྒྲུག་བྱས་པའི་ལས་བྱེད་པ་ལས་གྲུབ་པའི་ཁྲིམས་ལུགས་དྲིལ་བསྒྲགས་སློབ་གསོའི་ལས་དོན་ཚོགས་ཆུང་འདི་དགོན་པའི་ནང་བཅར་སྡོད་བྱས་ཡོད། ཁྲིམས་ལུགས་སློབ་གསོའི་མིང་གི་ཐོག་ནས་གྲ་བཙུན་མང་པོ་དམག་མི་དང་ཉེན་རྟོག་པའི་མཚོན་ཆའི་འོག་ནས་དགོན་པ་ནས་ཕྱིར་ཕུད་བྱས་པ་དང་དགོན་པར་ལྷག་པའི་གྲ་བཙུན་ཚོ་ངེས་པར་དུ་བཅོས་སྒྲིག་ནན་པོ་འདིའི་ནང་བཞུགས་དགོས་ཀྱི་ཡོད་པ་རེད། དཔེར་ན་ཟླ་བཞི་པའི་ཚེས་བཅུའི་ཉིན་ནས་བཟུང་ལྷ་སའི་སེར་འབྲས་དགའ་གསུམ་གྱི་དགོན་པའི་ནང་མཚན་མོ་གློ་བུར་དུ་དམག་མི་དང་ཉེན་རྟོག་པས་འཇབ་རྒོལ་བྱས་ཏེ་དགེ་འདུན་པ་སྟོང་ཕྲག་བརྒལ་བ་རང་རང་སོ་སོའི་གྲ་ཤག་ནས་འཛིན་བཟུང་བྱས་ཡོད། ཁོང་རྣམ་པ་ཧ་ལམ་ཀན་སུའུ་དང་མཚོ་སྔོན། ཟི་ཁྲོན། ཡུན་ནན་བཅས་ནས་ཕེབས་པའི་ཕྱག་དཔེ་གཟིགས་མཁན་གྱི་དགེ་འདུན་པ་ཤ་སྟག་ཡིན་པ་རེད། ཟླ་བ་བཞི་པའི་ཚེས་༢༥ཉིན་ཁོང་ཚོ་གསང་བའི་ཐོག་ནས་ན་སྒོར་མོར་ཡོད་པའི་དམག་སྒར་གྱི་བཙོན་ཁང་གཅིག་ནང་གནས་སྤོས་བྱས་ཏེ་པེ་ཅིང་གི་ཨོའོ་ལིན་ཕིག་ལུས་རྩལ་འགྲན་ཚོགས་མཇུག་སྒྲིལ་བྱུང་བའི་རྗེས་གཞི་ནས་རང་རང་སོ་སོའི་སྐྱེས་ཡུལ་དུ་བལྟ་སྲུང་དམ་པོའི་འོག་ཁྲིད་ཡོད་པ་དང་དུས་འདི་ནས་བཟུང་གདན་ས་ཆེན་པོ་གསུམ་ལ་སྐྱོད་ཆོག་གི་མེད་པ་རེད་འདུག མཚན་མོ་གཅིག་ལ་དགེ་འདུན་པ་སྟོང་ཕྲག་བརྒལ་བ་རྣམ་པའི་སྒོམ་པ་ཉམས་ལེན་བྱེད་ཡུལ་དང་འཚོ་བ་བསྐྱལ་ཡུལ་མེད་པར་འགྱུར་ཡོད། འཇིགས་རྟེན་པའི་ལྟ་ཕྱོགས་ཐོག་ནས་ཞུས་ན། འདི་ནི་ཁོང་རྣམ་པའི་ཁྱིམ་གཞིས་ཡིན་པ་རེད། དེའི་རྗེས་བོད་རང་སྐྱོང་ལྗོངས་མི་རིགས་ཆོས་དོན་ལྷན་ཁང་གི་གུང་ཁྲན་ཚོགས་པའི་དྲུང་ཆེས་གསར་འགྱུར་བརྒྱུད་ལམ་གཅིག་ལ་སེར་ར་དགོན་པའི་གནས་སྟངས་ངོ་སྤྲོད་བྱས་ཡོད་པ་སྟེ། དགོན་པའི་ཆོས་ཕྱོགས་ཀྱི་བྱེད་སྒོ་ཁག་སྔ་རྒྱུན་ལྟར་དུས་ཐོག་ལ་སྤེལ་གྱི་ཡོད་པ་དང་མཆོད་འབུལ་ཆོས་མཇལ་གྱི་བྱེད་སྒོ་རྒྱུན་ལྡན་ལྟར་བསྐྱར་གསོ་ཐུབ་ཡོད། དེ་བཞིན་དགེ་འདུན་པ་ལྔ་བརྒྱ་ལྷག་ཙམ་གྱི་སློབ་གཉེར་དང་འཚོ་བ་སོགས་སྔ་རྒྱུན་གཞི་བཟུང་སླར་གསོ་ཐུབ་ཡོད་པ་རེད་ཅེས་བརྗོད་ཡོད། དོན་དངོས་ཐོག་སེར་ར་དགོན་པའི་དགེ་འདུན་པ་ལྔ་བརྒྱ་མ་ཡིན་པར་དགེ་འདུན་པ་གཅིག་སྟོང་ལྷག་ཙམ་ཡོད་པ་རེད། དེའི་ནང་ཕྱེད་ཀ་ཙམ་ནི་ཨ་མདོ་དང་ཁམས་ནས་ཕེབས་པའི་ཕྱག་དཔེ་གཟིགས་མཁན་གྱི་དགེ་འདུན་པ་ཆགས་ཀྱི་ཡོད། འདི་ནི་༡༤༡༩ལོར་སེར་ར་དགོན་པ་ཕྱག་བཏབ་པ་ནས་བཟུང་ལོ་ངོ་ལྔ་བརྒྱ་ཙམ་རིང་ཆགས་པའི་སྲོལ་རྒྱུན་ཞིག་དང་ནང་ཆོས་དར་ནས་ལོ་ངོ་ཉེས་སྟོང་ལྷག་ཙམ་ཕྱིན་པའི་ནང་གི་ལམ་སྲོལ་ཞིག་ཡིན་ལ། དེའི་ནང་རྒྱ་མི་རིགས་ཀྱི་ནང་ཆོས་དགོན་སྡེ་ཁག་ཚུད་པའི་གྲ་བཙུན་ཡོད་ཚད་ཀྱི་འདུ་ཚོགས་ཞིག་སྟེ་ཕྱོགས་བཞི་མཚམས་བརྒྱད་ནས་ཕེབས་པའི་རབ་བྱུང་བ་ཚོའི་ཚོགས་སྡེ་ཞིག་ཡིན་པ་རེད། ཡིན་ནའི་དགོན་པར་དོ་དམ་བྱེད་མཁན་གྱི་གུང་ཁྲན་ཚོགས་པའི་དཔོན་རིགས་ནས་སེར་ར་དགོན་པར་དགེ་འདུན་པ་ལྔ་བརྒྱ་ལྷག་ཙམ་ལས་མེད་པ་བརྗོད་ཡོད། དེའི་ནང་ཨ་མདོ་དང་ཁམས་སོགས་ནས་ཕེབས་པའི་ཕྱག་དཔེ་གཟིགས་མཁན་གྱི་དགེ་འདུན་པ་ཚོ་བཅུག་མེད་པ་གསལ་པོ་རེད། ཡང་ཕྱག་དཔེ་གཟིགས་མཁན་གྱི་དགེ་འདུན་པ་ཚོ་མཚོན་ཆའི་ཁྲོད་ནས་ཕྱིར་ཕུད་བཏང་བའི་དངོས་ཡོད་གནས་ཚུལ་དེ་རིགས་བོད་ཀྱི་ནང་ཆོས་ཀྱི་རྒྱལ་རབས་ལོ་རྒྱུས་ཐོག་ཧ་ཅང་མཐོང་དཀའ་བ་ཞིག་དང་ཉེ་དུས་ནང་རྒྱ་ནག་གུང་ཁྲན་གཞུང་གིས་བོད་ས་ཡོངས་རྫོགས་དབང་སྒྱུར་བྱས་པའི་རྗེས་གཞི་ནས་བསྟུད་མར་ཐོན་པ་ཞིག་དང་ལྷག་པར་དུ་རིག་གནས་གསར་བརྗེའི་སྐབས་ཚབས་ལྗིད་ཤོས་ཆགས་ཡོད། གཞུང་འབྲེལ་གྱི་རྒྱ་ནག་གི་བོད་རིག་པའི་དྲ་གནས་ཐོག་ནས་རྩོམ་ཡིག་གཅིག་མཐོང་བྱུང་བ་འདིའི་འགོ་བརྗོད་དུ་བོད་རྒྱུད་ནང་བསྟན་གྱི་དགེ་བཤེས་མཚན་རྟགས་ཕུལ་བའི་སྒྲིག་སྲོལ་ཟེར་བའི་རྩོམ་འདིའི་ནང་འཁོད་པར། བོད་རྒྱུད་ནང་བསྟན་གྱི་དགོན་སྡེའི་སློབ་གསོ་འདི་སྤེལ་ནས་ད་བར་ལོ་ངོ་གཅིག་སྟོང་ལྷག་ཙམ་གྱི་ལོ་རྒྱུས་ཡོད་པ་དང་ཕྱག་དཔེ་གཟིགས་ནས་སྒོམ་པ་ཉམས་ལེན་གནང་བ་དང་མཚན་རྟགས་བཞེས་པའི་ལམ་སྲོལ་འདི་གལ་ཆེའི་གྲུབ་ཆ་ཞིག་ཆགས་ཀྱི་ཡོད། དགེ་ལུགས་ཀྱི་དགོན་སྡེ་ཁག་ནང་གི་དགེ་འདུན་པ་ཚོའི་བྱུང་ཁོངས་ནི་ཧ་ཅང་གི་རྒྱ་ཆེན་པོ་ཡིན་ཞིང་དེའི་ནང་མི་རིགས་ཀྱི་དབྱེ་བ་མེད་པའི་ཐོག་ཐ་ན་རྒྱལ་ཁོངས་ཀྱི་དབྱེ་བ་ཡང་མེད་པ་རེད། གང་ལྟར་དགོན་པར་འཛུལ་ནས་རབ་ཏུ་བྱུང་པ་གནང་བ་ཡིན་ན་སྒྲིག་གཞི་ལམ་སྲོལ་ཁག་ཚང་བའི་རྗེས་རང་ཉིད་ཀྱི་ཕ་ཡུལ་ལ་གཞིགས་ནས་ཁང་ཚན་སོ་སོར་བཅུག་གི་ཡོད་པ་རེད་ཅེས་འཁོད་བཞག འདིའི་ཁྲོད་ནས་གསལ་ཤེས་ཐུབ་རྒྱུར་དགོན་སྡེ་ཁག་ནང་གི་དགེ་འདུན་པའི་གྲུབ་ཆ་འདི་ས་གནས་ཁྱབ་ཁོངས་གཅིག་རང་གི་ནང་ནས་ཡིན་དགོས་ཀྱི་མེད་པ་གཞུང་ཕྱོགས་ནས་མ་ཤེས་པ་རྩ་བ་ནས་མ་རེད། ཡང་དེ་སྔའི་བོད་རྙིང་པའི་སྐབས་ལྷ་སའི་གདན་ས་གསུམ་ནང་སློབ་གཉེར་དང་སྒོམ་པ་ཉམས་ལེན་གནང་མཁན་གྱི་དགེ་འདུན་པ་གཙོ་བོ་བོད་པ་ཡིན་པ་ཕུད་ད་དུང་སོག་པོ་དང་ཉི་ཧོང་བ། རྒྱ་གར་བ། རྒྱ་ནག་ནས་ཡོང་མཁན་སོགས་དགོན་པའི་ནང་བཅུག་གི་ཡོད། ཡིན་ནའི་གཞུང་ཕྱོགས་ནས་ནུས་པ་ཡོད་རྒུ་རྩ་སྤྲུགས་བཏོན་ནས་བོད་རྙིང་པ་འདིར་སྐྱོན་བརྗོད་བྱེད་ཀྱི་ཡོད་རུང༌། ཁོ་པས་འགོ་ཁྲིད་བྱས་པའི་བོད་གསར་པ་འདིས་ནང་ཆོས་ཀྱི་ལམ་སྲོལ་འདི་རྣམས་ཁ་ཐོར་དགུ་ཐོར་བཟོ་ས་རེད། དེ་སྔ་འབྲས་སྤུངས་དགོན་པ་དང་སེར་ར་དགོན་པར་ཕྱག་དཔེ་གཟིགས་ནས་བཞུགས་མྱོང་ཡོད་མཁན་གྱི་དགེ་འདུན་པ་ཞིག་གིས་ངོ་སྤྲོད་གནང་བ་ལྟར་ན་དོན་དངོས་ཐོག་བོད་རང་སྐྱོང་ལྗོངས་ཕུད་པའི་ཕྱི་ཕྱོགས་ནས་ཕྱག་དཔེ་གཟིགས་པར་ཕེབས་མཁན་གྱི་དགེ་འདུན་པ་ཚོ་ཕྱིར་ཕུད་བྱེད་ཡག་གི་འཆར་གཞི་འདི་བཟོས་ནས་དུས་ཡུན་རིང་པོ་ཕྱིན་ཡོད་རུང་དགོན་པ་ནས་ཁས་ལེན་མ་བྱས་མེད་པར་རྟེན་ལག་བསྟར་བྱེད་ཐུབ་མེད། ཡང་དགོན་པ་ནས་འདིར་དྭངས་ལེན་བྱས་མེད་པ་དང་འདི་ཡང་དགོན་པ་རང་ངོས་ཀྱི་གནས་སྟངས་ལ་གཞིགས་པ་གཅིག་ཡིན་པ་རེད། གཞུང་ཕྱོགས་ནས་དགོན་པའི་ནང་དགེ་འདུན་པའི་གྲངས་ཚད་བཟོས་ཏེ་བཅུག་པའི་དགེ་འདུན་པ་ཚང་མ་བོད་རང་སྐྱོང་ལྗོངས་ཀྱི་ཕྱི་ནས་ཕེབས་པའི་ཕྱག་དཔེ་གཟིགས་མཁན་གྱི་དགེ་འདུན་པ་ཡོད་པ་མ་རེད། ཡང་དེ་ལས་ལྡོག་སྟེ་དགོན་པའི་སྐུ་དགྱེས་ཀྱི་ཐོབ་ཐང་ཡོད་པ་ཚོ་སློབ་སྦྱོང་དང་སྒོམ་པ་ཉམས་ལེན་ཐོག་དགོན་པའི་ནང་སྐུ་དགྱེས་ཀྱི་ཐོབ་ཆ་མེད་པ་དང་དགའ་ཉེ་སྤུན་མཆེད་མེད་པར་ཉེ་འཁོར་གྱི་རོགས་སྐྱོར་ལ་རྟེན་ནས་ཕྱག་དཔེ་གཟིགས་མཁན་གྱི་ཕྱི་ནས་ཕེབས་པའི་དགེ་འདུན་པ་ཚོ་དེ་བས་བརྩོན་འགྲུས་ཆེ་བ་དང་དེ་བས་གྲུབ་འབྲས་བཟང་བ་ཡོད་པ་རེད། གལ་ཏེ་ཁོང་རྣམ་པ་ཕྱིར་ཕུད་བཏང་བ་ཡིན་ན་གདན་ས་ཆེན་པོ་གསུམ་ནང་ལྷག་པ་ནི་མིང་ཙམ་ཡིན་པ་རེད། ཡིན་ནའི་གཞུང་ཕྱོགས་ནས་ལམ་སྲོལ་དེ་རིགས་ལ་བརྩི་མཐོང་བྱེད་པའི་བསམ་བློ་མེད་པར་ལོ་གསར་པ་ཤར་བ་དང་ཕྱག་དཔེ་གཟིགས་མཁན་གྱི་དགེ་འདུན་པ་ཚོ་ཕྱིར་ཕུད་བྱེད་པའི་དབྱུག་པ་འདི་མཐར་དགེ་འདུན་པ་ཚོའི་དབུའི་སྟེང་དུ་སླེབས་ཡོད་པ་རེད། ཟླ་བ་གསུམ་པའི་ཚེས་བཅུ་ཉིན་ནས་བཟུང་ལྷ་སར་གདན་ས་གསུམ་ནས་བསྟུད་མར་དགེ་འདུན་སྟོང་ཕྲག་བརྒལ་བས་ཞུ་འབོད་ཀྱི་རྔམ་སྟོན་ཁྲོམ་སྐོར་གནང་ཡོད། དོན་དངོས་ཐོག་གནད་དོན་འདི་དང་འབྲེལ་བ་ཆགས་ཀྱི་ཡོད། དགོད་དྲོ་བ་ཞིག་ལ་གཞུང་ཕྱོགས་ནས་ཁྲིམས་ལུགས་སློབ་གསོ་ཟེར་བ་འདི་ཁ་ལ་གཡར་ནས་ནོར་འཕྲུལ་འདིར་འགེབས་སྲུང་བྱེད་ཀྱི་ཡོད་པ་རེད། ཁ་སྣོན་བྱེད་དགོས་པ་ཞིག་ལ་རྒྱ་ནག་ནང་གི་རྒྱ་མི་རིགས་ཀྱི་དགོན་སྡེ་ཁག་ནང་མུ་མཐུད་ཕྱི་ཕྱོགས་ནས་ཡོང་བའི་དགེ་འདུན་པ་ཚོ་ཕྱག་དཔེ་སློབ་གཉེར་བྱེད་ཆོག་གི་ཡོད་པ་དང་རྒྱ་ནག་གི་ནང་བསྟན་ནང་ཡོད་པའི་དགོན་པར་ཞག་པོ་བཞུགས་ནས་ཕྱག་དཔེ་གཟིགས་པ་དང་དགོན་པའི་ནང་དངོས་བཞུགས་གནང་ནས་ཕྱག་དཔེ་གཟིགས་པ་སོགས་ཀྱི་ལམ་སྲོལ་འདི་མུ་མཐུད་གནས་མུས་ཡིན་པ་རེད། འདི་ལྟ་བུའི་དབྱེ་པ་ཕྱེ་ནས་བྱེད་སྟངས་དེ་འདྲ་ཞིག་འཛིན་པ་འདིས་ཁྲིམས་ལུགས་སློབ་གསོ་ཟེར་བ་འདིའི་རྒྱབ་ཕྱོགས་སུ་བོད་ཀྱི་ནང་པ་སངས་རྒྱས་པའི་བསྟན་པ་འདི་རང་ལ་དམིགས་ནས་སྤེལ་བའི་གོ་རིམ་ཡོད་པ་དང་ཁྱོན་ཡོངས་ནས་བསྐོར་བཅོམ་གྱི་ལས་འགུལ་ཞིག་མ་ཡིན་ནམ། གསན་མཁན་རྣམ་པ་ཚོ་དེ་རིང་གི་ལེ་ཚན་འདི་སྙན་སྒྲོན་ཞུ་མཚམས་འདིར་བཞག་གི་ཡིན། གོང་ཞུས་ཀྱི་ལེ་ཚན་འདི་རྩོམ་པ་རང་ཉིད་ཀྱི་གཟིགས་ཚུལ་ཡིན་པ་ལས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གི་ལྟ་བ་ཡིན་པས་ཁྱབ་ཀྱི་མེད་ལ་ང་ཚོའི་གསམ་མཁན་རྣམ་པ་ཚོས་ལེ་ཚན་འདི་གསན་པར་ཐུགས་བརྗེ་ཆེ་ཞུ་རྒྱུ་དང་ལེ་ཚན་འདི་ཕབ་སྒྱུར་དང་སྙན་སྒྲོན་ཞུ་མཁན་སྒྲོལ་དཀར་ཡིན། (ཨེ་ཤི་ཡ་རང་དབང་རླུང་འཕྲིན་ཁང་གི་ལེ་ཚན་འོད་ཟེར་ལགས་ཀྱིས་རྒྱ་ཡིག་ཐོག་རྩོམ་བྲིས་གནང་བ་འདི་སྒྲོལ་དཀར་ནས་སྒྱུར། )

དེ་རིང་གི་ཉིན་མོ།

༡༩༣༥ལོའི་ཟླ་༡༠ཚེས་༢༢ཉིན་རྒྱ་ནག་གི་མའོ་ཙེ་ཏུང་གིས་སྣེ་ཁྲིད་པའི་དམར་དམག་དང་ཧྲན་བའེ་ཕྱོགས་ཀྱི་དམར་དམག་མཉམ་འཛོམས་བྱུྱང་བ་དེས་ལོ་རྒྱུས་ཐོག་གི་ལེ་དབར་ཉིས་ཁྲི་ལྔ་སྟོང་གི་དམར་དམག་རྒྱང་བསྐྱོད་ཟེར་བ་འདི་མཇུལ་བསྒྲིལ་བ་རེད།(འཇམ་དཔལ་ཕུན་ཚོགས་ལགས་ཀྱིས་ཕྱོགས་སྒྲིག་གནང༌།)

དུག་རྫས་ཡོད་པའི་འོ་རྩམ་གྱིས་ལྷ་སའི་ཕྲུ་གུ་ཚོ་ཡང་ལུས་པོར་རྡོ་ཡོད་པའི་ཕྲུ་གུར་འགྱུར་བཞག

t1003-td.mp3གསན་ན། འོད་ཟེར་གྱི་གླེང་སྟེགས། པེ་ཅིང་གི་ཁྲོམ་རྭའི་ནང་འོ་མས་བཟོས་པའི་བཟའ་རིགས་གཙོང་ཡུལ་གྱི་ཁྲོམ་སྐྱག་ཚང་མ་སྟོང་པ་ཆགས་ཡོད་པས་སན་ཀླུའུ་རྟགས་ཅན་གྱི་བཟའ་རིགས་མཐོང་རྒྱུ་མེད་པར་འགྱུར་ཡོད་ལ། དེ་བཞིན་ཚོང་ཟོག་གི་མིང་ལ་མང་ཉུའུ་དང་ཡིས་ལིད། ཀོང་མིངས་སོགས་ཀྱི་འོ་མས་བཟོས་པའི་བཟའ་རིགས་ཡང་ཁྲོམ་སྐྱག་ཐོག་ནས་མེད་པ་བཟོས་ཡོད་པས་ཁྲོམ་རྭའི་ཐོག་ཧ་ལམ་སན་ཡོན་དང་ཐའ་ལུན་སུའུ་གཉིས་ཀྱི་མིང་ཡོད་པའི་ཚོང་ཟོག་ལས་ལྷག་མེད་པ་རེད་འདུག སན་ཡོན་ནི་པེ་ཅིང་རང་ནས་ཐོན་པའི་བཟའ་རིགས་ཞིག་ཡིན་པ་དང་འདིའི་ནང་དུག་རྫས་ཀྱི་རིགས་མེད་པའི་ཁས་ལེན་ཐེངས་མང་བྱེད་ཀྱི་ཡོད་རུང༌། པེ་ཅིང་གི་མི་ཚོས་གང་ལྟར་འདིར་དོག་པ་བྱས་ནས་བརྗོད་དོན་ལ། ངས་མིག་ཆེ་ཙམ་གདང་ན་མ་གཏོགས་སན་ཡོན་སན་ཀླུའུ་ལ་འགྱུར་སྲིད་ཀྱི་རེད་ཅེས་བརྗོད་མཁན་འདུག ཡིན་ནའི་རྒྱ་ནག་གི་ས་གནས་མང་པོར་པེ་ཅིང་གི་ཁྲོམ་སྐྱག་ཐོག་ནས་སྟོང་པ་བཟོས་ཟིན་པའི་འོ་མས་བཟོས་པའི་བཟའ་རིགས་ད་དུང་ཡང་མུ་མཐུད་གཙོང་བཞིན་ཡོད་པ་མ་ཟད། ད་དུང་གཅིག་ཉོས་ན་གཅིག་སྟེར་ནས་འཛད་སྤྱོད་པ་ཚོར་ཁེ་སངས་ཆེན་པོ་རགས་ཀྱི་ཡོད་པ་ལྟ་བུ་བྱེད་ཀྱི་ཡོད། ཧེའི་སྦད་དང་ཧྲན་ཤི་ཡི་དཔོན་རིགས་ནས་བརྙན་འཕྲིན་ཐོག་འོ་མ་མང་པོ་འཐུང་བ་དང་ཡང་ཀན་སུའུ་དང་ཧྲན་ཏུང་ཞིང་ཆེན་གྱི་སྲིད་གཞུང་ནས་བཀའ་ཡིག་འགྲེམ་སྤེལ་བྱས་ཏེ་ས་གནས་ཀྱི་མི་དམངས་ཚོས་འོ་མ་ཉོ་དགོས་པ་བརྗོད་ཡོད་དང་། འོ་མ་འདི་རྣམས་ཚང་མ་བློ་བདེ་པོ་བྱེད་ཆོག་པའི་འོ་མ་ཡིན་པས་འཐུང་པ་ཡིན་ན་གནད་དོན་གང་ཡང་མེད་པ་བརྗོད་བཞག ཡང་ང་ཚོའི་ལྷ་སར་གང་འདྲ་ཡིན་ནམ། དུག་རྫས་ཡོད་པའི་འོ་རྩམ་གྱི་གནད་དོན་འདི་ཕྱི་བསྒྲགས་བྱུང་བའི་ཉིན་མོ་འདི་ནས་དུས་ད་ལྟ་བར་ཁྲོམ་རྭའི་ཐོག་མཐོང་རྒྱུ་མེད་པར་འགྱུར་བའི་འོ་རྩམ་གྱི་རིགས་ནི་སན་ཀླུའུ་རྟགས་ཅན་གྱི་ཕྲུ་གུ་དམར་བྱར་གྱི་བེད་སྤྱོད་བྱེད་པའི་འོ་རྩམ་འདི་ལས་དེ་མིན་གྱི་འོ་མས་བཟོས་པའི་བཟའ་རིགས་མིང་སྐད་གྲགས་ཡོད་པ་དང་མིང་མེད་པ་ཚང་མ་གཙོང་མཁན་ཡོད་པ་རེད། ཤེས་རྟོགས་བྱུང་བར་གཞིགས་ན། བོད་ཀྱི་ས་ཁུལ་ཚང་མའི་ནང་གཅིག་མཚུངས་རེད་འདུག དུག་རྫས་ཡོད་པའི་འོ་མ་དང་དུག་རྫས་ཡོད་པའི་འོ་རྩམ་གྱི་རིགས་འདི་ཚོས་ལྷ་ས་དང་དེ་མིན་བོད་ཀྱི་ས་ཁུལ་ཁག་ནང་གནོད་འཚེ་བཟོ་གི་མེད་པ་རེད་དམ། བོད་ས་ཡོངས་ནང་གི་མི་ཚོས་རང་ཉིད་ཀྱི་ཕྲུ་གུ་ཡང་ལུས་ལ་རྡོ་ཡོད་པའི་ཕྲུ་གུ་ཆགས་པར་སེམས་ཚབ་མེད་པ་རེད་དམ། ཐ་ན་རང་ཉིད་ཀྱི་ལུས་པོའི་ནང་ལ་ཡང་རྡོ་སྐྱེས་སྲིད་ཀྱི་མ་རེད་དམ། ཚང་མས་བོད་འདི་དྭངས་གཙང་གི་ས་ཆ་མཐའ་མ་འདི་ཡིན་པ་དང་། གནམ་སྔོ་ཞིང་སྤྲིན་པ་དཀར་བ། ནོར་ལུག་ཁྱུ་དང་ཁྱུ་ཡོད་པ་བརྗོད་ཀྱི་ཡོད་པས་རྒྱ་ནག་ནས་དབོར་འདྲེན་བྱས་པའི་འོ་མས་བཟོས་པའི་བཟའ་རིགས་འདི་རྣམས་གྲོང་ཁྱེར་ནང་གི་མི་ཚོས་མ་གཏོགས་ཉོ་མཁན་མེད་པར་བོད་མི་མང་ཆེ་བས་རྩ་ཐང་སྟེང་གནས་པའི་ཕྱུགས་ཟོག་གི་སྤུས་དག་འོ་མ་འདི་དག་བེད་སྤྱོད་བྱེད་བཞིན་ཡོད་པར་གུས་མོས་ངོས་འཛིན་བྱེད་ཀྱི་ཡོད། ཡིན་ནའི་ལྷ་ས་མི་དམངས་སྨན་ཁང་གི་ཨེམ་ཆེས་བརྗོད་དོན་ལ་ཟླ་བ་དགུ་པའི་ཚེས་༡༨ཉིན་ནས་ཚེས་༢༢བར་རགས་རྩིས་བྱས་ན་ཕྲུ་གུ་ཆིག་སྟོང་ཙམ་ཞིག་རྟགས་དཔྱད་བྱེད་པར་སླེབས་ཡོད་པ་དང་དེའི་ནང་ལུས་པོར་རྡོ་ཆགས་ནས་ནད་གཞི་ལྗིད་པོ་ཡོད་པའི་ཕྲུ་གུ་༡༣སྨན་བཅོས་ཆེད་སྨན་ཁང་ལ་བསྡད་དགོས་བྱུང་ཡོད་པ་མ་ཟད། ད་དུང་ནད་གཞི་ཅུང་ཡངས་བའི་ཕྲུ་གུ་བཅུ་གྲངས་ཞིག་རང་ཁྱིམ་དུ་ཕྱིར་ལོག་བྱས་ནས་སྨན་བཅོས་བྱས་ཡོད་པ་རེད་འདུག དེའི་ནང་མང་ཆེ་བ་བོད་པའི་ཕྲུ་གུ་ཡིན་པ་དང་། དེ་ཡང་སྨན་ཁང་གཅིག་རང་ནས་རྟགས་དཔྱད་ཐུབ་པའི་ནད་པ་རེད། གང་འདྲ་ཡིན་རུང་རྒྱང་ཐག་ཆོད་ནས་གནམ་གྱི་མཐའ་རུ་ཡོད་པའི་བོད་ཀྱི་ས་ཆ་འདི་བཞིན་ད་ཆ་ནི་རང་ཉིད་ཀྱི་སྲུང་སྐྱོབ་བྱེད་ཐུབ་པའི་དྭངས་གཙང་གི་ས་ཆ་ཞིག་མིན་པ་རེད། སྤྱི་ལོ་༢༠༠༣ལོར་འཇིགས་སྣང་ཆེ་བའི་Sars རིམས་ནད་འདི་རྒྱ་ནག་རྒྱལ་ཡོངས་ནང་ཁྱབ་རྡལ་ཕྱིན་ཏེ་གནོད་འཚེ་ཆེན་པོ་བཟོས་ཡོད། ཡིན་ནའི་བོད་ཁུལ་དུ་ནད་གཞི་གཅིག་ཀྱང་ཐོན་མེད་པས་བོད་མི་ཚོས་དགའ་ཚོར་དང་སྦྲགས་ད་དུང་བྱམས་སྙིང་རྗེའི་སེམས་པ་ཞིག་གི་ཐོག་ནས་རྒྱ་ནག་ནང་བོད་ཀྱི་སྤོས་དང་བོད་སྨན་མང་པོ་བསྐུར་བ་དང་། Sarsརིམས་ནད་འདིར་སྔོན་འགོག་གི་ནུས་པ་ཆེན་པོ་ཡོད་པ་བརྗོད་ཀྱི་ཡོད། ཡིན་ནའི་ཉེ་བའི་ལོ་ཤས་ནང་རྒྱ་ནག་ནང་ལ་རིམས་ནད་ཞིག་ཁྱབ་རྡལ་ཕྱིན་ཡོད་ན་བོད་ནང་ལ་རིམས་ནད་དེ་རིགས་ལམ་སེང་ཁྱབ་རྡལ་ཡོང་གི་ཡོད་པ་དཔེར་ན། བྱ་ནད་དང་འཇམས་ནད་སོགས་ཡིན་པ་རེད། ད་ཆ་ཕྲུ་གུའི་ལུས་པོར་རྡོ་ཆགས་པའི་ནད་གཞི་འདི་ཡང་བོད་པའི་ཁྱིམ་ཚང་དུ་སླེབས་ཡོད་པ་འདིས་གང་མངོན་གྱི་ཡོད་པ་རེད་དམ་ཞུས་ན། རྒྱ་ནག་ནང་འཛམ་གླིང་ཧྲིལ་པོར་འགྱུར་འགྲོ་བ་དང་བོད་ཁུལ་ལ་རྒྱ་ནག་ཅན་དུ་འགྱུར་འགྲོ་བའི་ད་ལྟའི་རྣམ་པ་འདི་མངོན་གྱི་ཡོད་པ་རེད། དེའི་ནང་དཔེར་ན་མདོ་དབུས་རི་ལིའི་ལྕགས་ལམ་ཤར་སྐྱོད་ཐུབ་པ་འདིས་ཕྱི་ཚུལ་ནས་དེང་རབས་ཅན་དུ་འགྱུར་བ་དང་དོན་ངོ་མ་མི་སེར་སྤེལ་ཡུལ་དུ་འགྱུར་པའི་རྣམ་པ་འདི་མགྱོགས་རུ་ཕྱིན་ཡོད། ཁྲོམ་རྭའི་དཔལ་འབྱོར་གྱི་སྐུལ་འདེད་འོག་སྤུས་ཚད་ཞན་པའི་དངོས་ཟོག་རྫུན་མའི་ནང་དུག་རྫས་ཡོད་པའི་བཟའ་རིགས་སྣ་ཚོགས་རྫོགས་རྒྱུ་མེད་པར་བོད་ནང་སླེབས་ཀྱི་ཡོད་པ་དང་། དེ་སྔོན་ལམ་འགྲོ་རྒྱུགས་པའི་བོད་ཁུལ་དུ་ Sars རིམས་ནད་ལས་ཐར་ཐུབ་པའི་ནུས་པ་འདི་ད་ཆ་རྩ་བ་ནས་མེད་པ་རེད་ལ། ཐ་ན་Sars རིམས་ནད་ཀྱི་རླུང་འཚུབ་འདི་བསྐྱར་དུ་སླེབས་པ་ཡིན་ན་བོད་མི་ཚོ་ཡང་རང་མགོ་ཐོན་དཀའ་བ་ཞིག་ཆགས་རྒྱུ་རང་རེད། བྱ་ཚང་མགོ་རྟིང་བསློགས་གྱུར་ན། བྱ་སྒོང་མི་ཆག་ག་ལ་སྲིད་ཟེར་བའི་དཔེ་ལྟར་ཡིན་པ་རེད། དུས་ཡུན་ལོ་ལྔའི་ནང་བོད་དང་རྒྱ་ནང་དབར་དེ་བས་རྒྱལ་ཕམ་ཐག་གཅོད་དཀའ་བ་ཞིག་ཏུ་འགྱུར་ནས་བོད་ཁུལ་གྱི་མང་ཚོགས་དང་རྒྱ་ནག་གི་མང་ཚོགས་ཚོ་ལས་དབང་གི་བདེ་སྡུག་འདི་བཞིན་ཧ་ལམ་མཉམ་དུ་མྱོང་དགོས་ཀྱི་ཡོད་པ་དང༌། ལྷག་པར་དུ་འདི་ནི་སྐྱིད་པོར་ཉིས་བརྩེགས་མེད་པར་སྡུག་པོར་སུམ་བརྩེགས་ཡོད་ཟེར་བའི་ཐོག་མངོན་གྱི་ཡོད། འདི་ནི་ངེས་པར་དུ་མཐོང་ཆེན་བྱེད་དགོས་པའི་གནད་དོན་ཞིག་ཡིན་པ་རེད། དེ་ཡང་ད་ཆ་བོད་ཁུལ་གྱི་རང་གྲུབ་སྲུང་ཡོལ་རེ་རེ་བཞིན་ཤོར་ནས་རྩ་སྟོང་ལ་འགྱུར་འགྲོ་བའི་སྐབས་དེར་བོད་མི་ཚོས་རང་སྲུང་གི་ཡོལ་བ་གསར་པ་ཞིག་བཙུགས་ཐུབ་པ་ཡིན་ན་གཞི་ནས་འཚོ་གནས་ཐུབ་རྒྱུ་རེད། ཡང་ཡོལ་བ་གསར་པ་འདི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་དང་ཐོབ་ཐང་ཐོག་གཙོ་བོར་བཞག་དགོས་ཀྱི་ཡོད། ཡང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་འདི་བོད་མི་རིགས་ཀྱི་གནའ་རབས་སྲོལ་རྒྱུན་རིག་གཞུང་ཐོག་ནས་ལེན་ཐུབ་པ་དང་ཐོབ་ཐང་ནི་མི་མི་རེ་ངོ་རེའི་རང་རང་གི་ཚེ་སྲོག་ཀྱི་ལ་རྒྱ་དང་འབྲེལ་བ་ཡོད་པ་རེད། ང་ཚོར་ཡོད་པ་ནི་རྨ་ཁས་ཁེངས་པ་ཞིག་ཡིན་ན་ཡང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་རིན་ཐང་འདི་ད་དུང་ཡང་ང་ཚོར་ཡོད་པ་རེད། ཡིན་ནའི་ང་ཚོར་རང་རྟོགས་དང་ཤེས་ཚོར་འདི་གདེང་ངེས་ཞིག་མེད་པས་ཐ་ན་སྒེར་སོ་སོའོ་ཐོབ་ཐང་ལ་རྟག་ཏུ་བརྩི་མེད་འགྲོ་ཡི་ཡོད་པ་ཡིན་ནའི་འདི་གང་འདྲ་བྱས་ནས་འགན་འཁྲི་རྩད་གཅོད་བྱེད་ཡག་གི་བསམ་པ་རྩ་བ་ནས་མེད་པ་རེད། གང་འདྲ་བྱས་ནས་རང་ཉིད་ཀྱི་སྤྱི་འབངས་ཐོབ་ཐང་ལ་སྲུང་སྐྱོབ་བྱེད་ཤེས་མཁན་གྱི་རྒྱ་ནག་གི་མི་དང་བསྡུར་ན་ང་ཚོའི་ངོས་ནས་སྔོན་ལ་སྐྱོད་མཁན་ཚོ་གང་མགྱོགས་རྗེས་ཟིན་ཐུབ་པ་ངེས་པར་དུ་བྱེད་དགོས་ཀྱི་འདུག་ལ། ངེས་པར་དུ་བདེན་པ་མཐའ་སྐྱེལ་དང་ཨུ་ཚུགས་མཐའ་སྐྱེལ་བྱེད་དགོས་ཀྱི་འདུག དཔེ་མཚོན་ཞིག་ཞུས་ན། [...]

འདམ་གཞུང་ལ་ས་ཡོམ་བྱུང་བའི་ཁྲོད་ནས་བཀའ་དྲིན་ཚོར་བཅུག་པའི་གོ་སྐབས་ཞིག་མ་ཡིན།

t1010-td.mp3གསན་ན། འོད་ཟེར་གྱི་གླེང་སྟེགས། དྲ་རྒྱའི་སྟེང་བོད་མི་འགའ་རེས་ངོ་སྤྲོད་བྱ་དོན་ལ། གཙང་གི་བཀྲ་ཤིས་ལྷུན་པོ་དགོན་པ་ནས་པར་སྐྲུན་གནང་བའི་འབྲེལ་ཡོད་རབ་གནས་ས་བྱི་ལོའི་བོད་ཀྱི་ལོ་ཐོའི་ནང་ལོ་འདིར་སྔོན་དཔག་ཞིག་གནང་ཡོད་པ་སྟེ་ལོ་འཁོར་མའི་ནང་རླུང་འཚུབ་དང་ས་ཡོམ་ཡོད་པ་འཁོད་ཡོད་ལ། དེ་བཞིན་ཡང་ས་ཡོམ་དང་ཇག་རྐུན་མང་རུ་འགྲོ་རྒྱུ་ཡིན་པ་ཡང་འཁོད་ཡོད། འདིའི་ཁྲོད་ནས་ད་ལོ་ཐོན་པའི་རྒྱུན་ལྡན་མ་ཡིན་པའི་རང་བྱུང་གི་གནས་སྟངས་དང་མི་ཡུལ་གྱི་ཟང་ཟིང་གཡོ་འགུལ་འདི་རྣམས་ལ་ལྟ་དུས་མི་རྣམས་ཀྱིས་ལོ་ངོ་སྟོང་ཕྲག་སྔོན་ནས་ཐོན་པའི་བོད་ཀྱི་ལོ་རྩིས་ཐོག་ནས་ཏག་ཏག་གནད་ལ་འཁེལ་བའི་འདེད་རྩིས་རྒྱག་ཐུབ་པ་དང་འདིའི་རིན་ཐང་འདིར་བསྔགས་བརྗོད་བྱེད་ཀྱི་ཡོད། ཡིན་ནའི་ལྟ་ཞིབ་ཚད་ལེན་དང་ས་ཡོམ་གྱི་སྔོན་བརྡ་གཙོ་བོ་བྱེད་མཁན་དང་ད་དུང་ས་གནས་ཁག་ནང་ས་ཡོམ་རྟོགས་ཞིབ་ལས་ཁུངས་དང་ས་ཡོམ་རྟོགས་ཞིབ་བབ་ཚུགས་ཆེད་མངགས་བཙུགས་ནས་དེང་རབས་ཚན་རིག་ཞིབ་འཇུག་གི་ཚན་པ་ཡིན་པ་འུད་ཤོབ་སྒྲོགས་ཀྱི་ཡོད་ན་ཡང་ག་དུས་ཡིན་རུང་དོན་དག་ཚར་རྗེས་བློ་བཀོད་འདོན་གྱི་ཡོད། ཟླ་བ་བཅུ་པའི་ཚེས་དྲུག་ཉིན་ལྷ་སའི་ཉེ་འགྲམ་གྱི་འདམ་གཞུང་རྫོང་ལ་ས་ཡོམ་འགུལ་ཚད་6.6བྱས་པ་ཞིག་རྒྱབ་ཡོད་པ་དང་དེའི་ཁྲོད་ནས་ལྷ་ས་དང་གཞིས་རྩེ་སོགས་ས་ཁུལ་ཁག་གཅིག་ལ་མངོན་གསལ་དོད་པོའི་གཡོ་འགུལ་བྱུང་ཡོད་པ་རེད། བོད་རང་སྐྱོང་ལྗོངས་ས་ཡོམ་རྟགས་དཔྱད་ཚན་པ་ནས་ས་ཡོམ་གྱི་རྗེས་སྙན་ཐོ་ཞིག་བཏོན་ཡོད་པར་གཞིགས་ན། ཚེས་༨ཀྱི་དགོང་དྲོ་ཆུ་ཚོད་བཅུ་དང་སྐར་མ་༥༠བར་འདམ་གཞུང་ཁུལ་དུ་འགུལ་ལྷག་ཐེངས་༤༩༠ལྷག་ཙམ་རྒྱབ་ཡོད་པ་དང་། དེའི་ནང་འགུལ་ཚད་3.0ནས་འགུལ་ཚད་3.9བྱས་པ་ཐེངས་༡༩རྒྱབ་ཡོད་པ། འདི་ནས་འགུལ་ཚད་5.0ཡན་གྱི་རིམ་པ་མི་འདྲ་བའི་འགུལ་ལྷག་ཐེངས་གཉིས་རྒྱབ་ཡོད་པ་རེད་འདུག འདི་ལོ་ཟླ་བ་ལྔ་པའི་ནང་ལུང་འགོར་ས་ཡོམ་གྱི་གནོད་འཚེ་ཚབས་ཆེན་ཞིག་ཐོན་པ་འདིའི་ཁྲོད་ནས་མིའི་ཚེ་སྲོག་དང་རྒྱུ་ནོར་ལ་གྱོང་གོན་ཆེན་པོ་ཕོག་ཡོད་པས་གསར་འགྱུར་བརྒྱུད་ལམ་གྱི་བརྙན་འཕྲིན་དང་ཡིག་ཐོག་སོགས་མང་པོའི་ཐོག་ནས་མུ་མཐུད་གནས་ཚུལ་ཕོན་ཆེན་སྤེལ་བར་རྟེན་མི་ཚོས་འདི་ལྟ་བུའི་གཡོ་འགུལ་ཁྲོད་ནས་ས་ཡོམ་གྱི་ཉེན་ཁའི་རང་བཞིན་འདི་ཤེས་འཚོར་ཐུབ་ཡོད་ལ། སེམས་ནང་ལ་ཡང་ས་ཡོམ་གྱི་བག་ཆགས་གཟབ་མོ་ཞིག་བྱུང་ཡོད་པ་རེད། ཉིན་ཤས་རིང་དཔེར་ན་ལྷ་སར་མི་རྣམས་དངངས་སྐྲག་སྐྱེ་བ་དང་སློབ་གྲྭ་ཁག་སྔོན་ལ་འགྲོལ་བ་འམ་ཡང་ན་དགུང་གསེང་བཞག་པ། ཕོ་བྲང་པོ་ཏྰ་ལའི་ཐང་ཆེན་དང་ལྷ་ལྡན་གཙུག་ལག་ཁང་གི་ཐང་ཆེན་སོགས་ས་སྟོང་ཡོད་སར་མོ་ཀྲ་དང་མིས་ཁེངས་ནས་ཡོད་པ་རེད་འདུག ས་ཡོམ་ནི་རྟག་ཏུ་གློ་བུར་དུ་ཡོང་གི་ཡོད་པས་ས་ཡོམ་གྱི་སྔོན་བརྡ་གང་ཡང་མ་འབྱོར་བའི་གནས་སྟངས་འོག་མི་ཚོས་ཐབས་ཤེས་སྣ་ཚོགས་བེད་སྤྱད་ནས་རང་སྲུང་བྱེད་རྒྱུ་རང་ཡིན། གུས་མོས་གོ་ཐོས་བྱུང་བའི་འགེག་བར་ལས་གཡོལ་ཐབས་ཀྱི་ཐབས་ཤེས་གཅིག་ནི་ཁང་པའི་སྟེང་ལ་ས་དཀར་གྱིས་གཡུང་དྲུང་རི་མོ་བྲིས་པ་དང་དེ་ནས་འབྲས་ཀྱིས་ཁེངས་པའི་ཁོག་མ་དཀར་པོ་འདི་གཡུང་དྲུང་གི་རི་མོ་འདིའི་དབུས་སུ་བཞག་དགོས་ཀྱི་ཡོད་པ་རེད། གཡུང་དྲུང་ནི་བོན་ཆོས་ཀྱི་མཚོན་རྟགས་ཞིག་ཡིན་པ་དང་བོན་ཆོས་ནང་ལ་ས་གཞི་ཁམས་ཀྱི་ལྷ་ཚང་མ་འདུས་ཡོད་པས་འདི་འདྲ་བྱས་པ་ཡིན་ན་བསྙེན་བཀུས་ཞུས་པ་ཞིག་ཆགས་ཀྱི་ཡོད། དེ་ཡང་བཀུར་ཞིང་སྐྲག་པ་དང་སེམས་གསོ་རང་ཡིན་པ་རེད། ལྷ་མེད་སྨྲ་བའི་གཞུང་གི་ངོས་ནས་ཞུས་ན། འདིར་གཏན་གཏན་ཁྲེལ་དགོད་བྱེད་རྒྱུ་རང་རེད། ཉིན་ཤས་རིང་གི་གནས་སྟངས་ཐོག་ནས་བལྟས་ན། གཞུང་ཕྱོགས་ཀྱི་གསར་འགྱུར་བརྒྱུད་ལམ་ནས་དང་ཐོག་གནོད་འཚེ་ཕོག་ཡུལ་ལ་མི་༣༠ལྷག་ཙམ་ཞིག་འདས་གྲོང་ལ་སོང་ཡོད་པ་བརྗོད་པ་དང་དེ་རྗེས་ཆུ་ཚོད་ཁ་ཤས་ཕྱིན་པའི་རྗེས་འདས་གྲོང་ལ་ཕྱིན་པའི་གྲངས་ཚད་མི་བཅུ་ལ་སྒྱུར་བ་བཏང་ཡོད། འདིའི་དབར་ལ་ཁྱད་པར་ཆེན་པོ་ཕྱིན་ཡོད་པ་རེད། ཡིན་ནའི་གཞུང་ཕྱོགས་ཀྱི་གསར་འགྱུར་བརྒྱུད་ལམ་ནས་འགྲེལ་བརྗོད་གང་ཡང་བྱས་མེད། ཡིན་ནའི་ལྷ་སའི་ནང་གི་སྟབས་བདེའི་ལག་ཐོག་ཁ་པར་སྟེང་འཕྲིན་ཐུང་འདི་འདྲ་ཞིག་འབྱོར་གྱི་ཡོད་པ་སྟེ་དཀྲོག་གཏམ་འདི་རྣམས་བཀག་དགོས་པ་བརྗོད་ཀྱི་ཡོད་པ་ཡིན་རུང་དཀྲོག་གཏམ་འདི་དང་ཐོག་གཞུང་ཕྱོགས་རང་ཉིད་ཀྱི་གསར་འགྱུར་ཐོག་ནས་ཐོན་པ་ཞིག་རེད། ད་དུང་གཞན་ཞིག་ནང་ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ནས་འདམ་གཞུང་ས་གནས་རང་གི་སྨན་ཁང་ལ་གནས་ཚུལ་རྩད་གཅོད་ཞུ་སྐབས་གནོད་འཚེ་ཕོག་ཡུལ་གྱི་མི་དམངས་ཚོའི་རྨས་སྐྱོན་གྱི་གནས་སྟངས་སོགས་གསང་དབང་ལ་རྩིས་ནས་གསར་འགོད་པར་བརྗོད་ཀྱི་མེད་པ་རེད་འདུག འདི་རྒྱུ་མཚན་གང་ཡིན་ནམ། དམིགས་ཡུལ་གང་ཞིག་ཡིན་ནམ། ས་ཡོམ་ནི་རང་བྱུང་གི་གནོད་འཚེ་ཞིག་ཡིན་པས་འདིར་གསང་བ་དམ་པོ་འདི་འདྲ་བྱེད་དགོས་དོན་གང་ཡོད། ཡིན་ནའི་དོ་སྣང་བྱེད་དགོས་པ་ཞིག་ལ། གཞུང་ཕྱོགས་ཀྱི་གསར་འགྱུར་བརྒྱུད་ལམ་ཁག་ནས་གནས་ཚུལ་སྤེལ་བ་ཚང་མ་བྱས་རྗེས་དང་བཀའ་དྲིན་ལ་བསྟོད་བསྔགས་བྱེད་པ་ཤ་སྟག་དང་བརྙན་པར་ཚང་མའི་ནང་ཐོན་ཡག་མང་ཤོས་ནི་དཔོན་རིགས་དང་བཅིང་འགྲོལ་དམག དྲག་ཆས་ཉེན་རྟོག་པ། དེ་བཞིན་ཉེན་རྟོག་པ་བཅས་ཡིན་པས་ཚང་མ་རང་བྱུང་གནོད་འཚེ་འདིའི་ནང་མྱུར་སྐྱོབ་བྱེད་མཁན་གྱི་དཔའ་བོ་ལ་འགྱུར་ཡོད་པ་རེད། ཡིན་ན་ཡང་འདིའི་སྔོན་ལ་ཟླ་བ་གསུམ་པ་ནས་བོད་ས་ཡོངས་ནང་ངོ་རྒོལ་གྱི་རྔམ་སྟོན་ཁྲོམ་སྐོར་གཞི་རྒྱ་ཆེན་པོ་འདི་འདྲ་ཐོན་པའི་སྐབས་དམག་མི་དང་ཉེན་རྟོག་པ་ཚོས་ཁྱོན་ཡོངས་ཀྱི་དྲག་ཆས་སྤྲད་དེ་བོད་ཀྱི་ས་གནས་སུ་ཚར་གཅོད་གཙང་སེལ་བཟོས་ནས་མང་ཚོགས་ལ་དྲག་གནོན་བྱེད་པའི་རང་གཤིས་འདི་གསལ་པོར་བཏོན་ཡོད་པ་རེད། འདི་ལྟ་བུའི་གནམ་ས་འཛོལ་བའི་རྣམ་འགྱུར་ལ་འཕྲལ་དུ་སྒྱུར་བ་བཏང་དགོས་དོན་ནི་དམག་མི་དང་ཉེན་རྟོག་པའི་ངན་པ་ཐ་ཤལ་གྱི་བག་ཆགས་འདིར་འགྱུར་ལྡོག་ཡོང་བའི་ཆེད་དུ་ཡིན་ས་རེད། དོན་དངོས་ཐོག་གཞུང་ཕྱོགས་ནས་སྒྱུར་བ་བཏང་ཡོད་པ་གང་ཡང་ར་སྤྲོད་ཐུབ་རྒྱུ་མིན་པ་རེད། དབང་སྒྱུར་ཤོག་ཁའི་ཕྱོགས་ཀྱི་དབང་འཛིན་པའི་ངོས་ནས་ཞུས་ན། གོད་ཆག་ཆེན་པོ་འདི་འདྲ་ཞིག་ལ་མྱུར་སྐྱོབ་བྱེད་ཡག་འདི་ཚང་མའི་ལས་འགན་ཞིག་ཆགས་ཀྱི་ཡོད། ཡིན་ནའི་གཞུང་ཕྱོགས་ཀྱིས་རྒྱུན་དུ་ནས་བྱ་བ་ངན་པ་ཞིག་བྱ་བ་བཟང་པོ་ཞིག་ལ་སྒྱུར་ཡག་འདི་ཁོང་ཚོའི་ཁྱད་ཆོས་ཞིག་ཆགས་ཡོད་པས་རྒྱ་ཆེའི་མང་ཚོགས་ཚོས་མིག་ཆུ་བཏང་བཞིན་བཀའ་དྲིན་སེམས་བཅངས་བྱེད་བཅུག་ཡག་འདི་ཁོང་ཚོའི་ཁྱད་ཆོས་རེད། རྒྱ་ནག་གི་ཁྱད་ཆོས་ལྡན་པའི་དྲིན་ཅན་ཡིན་ཟེར་བའི་སྲིད་དོན་གྱི་བྱེད་སྟངས་འདི་ས་ཡོམ་གྱི་གོད་ཆག་ཁྲོད་གསལ་པོ་བཏོན་གྱི་ཡོད་པ་མ་ཟད། ད་དུང་ས་ཡོམ་གྱི་རྗེས་ལ་ཡང་ཉིན་ལྟར་རྫོགས་རྒྱུ་མེད་པ་ནན་བརྗོད་བྱེད་པ་དང་ཟླ་བ་ཆ་ཚང་བརྗོད་པ། ལོ་ལྟར་བརྗོད་པ་སོགས་བྱེད་ཀྱི་ཡོད་པས་ང་ཚོས་རྗེས་ལ་ལྟ་རྒྱུ་རེད། ས་ཡོམ་རྟོག་ཞིབ་མཁས་དབང་ནས་ཉེ་ཆར་གསུང་པར། གངས་ལྗོངས་ས་མཐོའི་དམིགས་བསལ་གྱི་ས་གཤིས་ཆགས་ཚུལ་ཐོག་ནས་ས་གནས་འདིའི་ཁུལ་ལ་ས་ཡོམ་བསྟུད་མར་ཐོན་གྱི་ཡོད་པ་དང་ཉེ་ཆར་གྱི་དུས་ཚོད་ནང་གངས་ལྗོངས་མཐོའི་ཤར་ཕྱོགས་མཚམས་སུ་གཡོ་འགུལ་མང་ཙམ་ཡོད་པ་དང་ཡིན་ན་ཡང་འདིའི་ཐོག་ནས་ཟླ་དགུ་པ་དང་ཐ་ན་ཟླ་བ་བཅུ་པའི་ནང་གངས་ལྗོངས་ས་མཐོའི་ཤར་ལྷོ་ཁུལ་ལ་ས་ཡོམ་ཆེན་པོ་ཡོང་སྲིད་པ་གཏན་འཁེལ་བྱེད་རྒྱུ་མེད། འདི་ འདྲ་བརྗོད་དགོས་དོན་ནི་དེ་ལས་ཤུགས་ཚད་ཆེ་བའི་ས་ཡོམ་ཡོང་སྲིད་མིན་གྱི་ཐད་ཚོད་དཔག་བྱེད་དཀའ་བ་ཞིག་ཡིན་པས་གཅིག་བྱས་ན་ཡོང་སྲིད་པ་ཞིག་དང་ཡང་གཅིག་བྱས་ན་ཡོང་མི་སྲིད་པ་ཞིག་རེད། གངས་ལྗོངས་ས་མཐོའི་སྟེང་འཚོ་བ་བསྐྱལ་མཁན་གྱི་བོད་མི་ཚོའི་ངོས་ནས་ཞུས་ན། རང་བྱུང་གི་གནོད་འཚེར་ཁ་ཕྱོགས་སྐབས་ཐབས་ཤེས་གང་ཡང་མེད་པས་རེ་བ་གཅིག་ཡོད་པ་འདི་སྐབས་འཕྲལ་ས་ཡོམ་གྱི་འབྲེལ་ཡོད་ཤེས་བྱ་མང་ཙམ་རགས་ཐུབ་པའི་རེ་བ་དང་དེ་བཞིན་ས་ཡོམ་གྱི་སྔོན་བརྡ་དང་དེ་མིན་གནས་ཚུལ་ཤེས་རྟོགས་ཀྱི་ཐོབ་ཐབ་ཡོང་བའི་རེ་བ་བྱེད་རྒྱུ་རང་རེད། དེ་མིན་ད་དུང་གྲོས་འགོ་ཁག་གཅིག་ཁ་སྣོན་བྱ་རྒྱུར་དང་པོ་རྒྱལ་སྤྱིའི་གསར་འགྱུར་བརྒྱུད་ལམ་གནོད་འཚེ་ཕོག་ཡུལ་དུ་གནས་ཚུལ་མཁོ་གྲུབ་ལ་བཏང་ནས་ས་ཡོམ་གྱི་གནས་ཚུལ་དང་མི་སྤྱོད་ཀྱི་རོགས་སྐྱོར་བྱེད་པར་བཏང་དགོས་པའི་བསམ་འཆར་ཕུལ་རྒྱུ་དང་། གཉིས་པ་རྒྱལ་སྤྱི་ཚོགས་པ་དང་དེ་བཞིན་ཕྱི་ཕྱོགས་སུ་ཡོད་པའི་བོད་མིའི་ཚོགས་པ་ཁག་གི་མི་སྤྱོད་རོགས་སྐྱོར་ལེན་དགོས་པའི་བསམ་འཆར་དང༌། གསུམ་པ་ད་ལྟའི་འཆར་གསར་འགྱུར་བརྒྱུད་ལམ་ཁག་ནས་གནོད་འཚེ་ཕོག་ཡུལ་དུ་དཔོན་རིགས་ཀྱིས་འཚམས་འདྲིར་སྐྱོད་པ་དང་དམག་མི་དང་ཉེན་རྟོག་པས་མྱུར་སྐྱོབ་བྱས་པ་སོགས་ཀྱི་བཀའ་དྲིན་སྙིང་བཅངས་དགོས་པའི་གནས་ཚུལ་མང་པོ་ཞིག་གཙོ་བོར་བྱས་ནས་སྤེལ་བ་ལས་གནོད་འཚེ་ཕོག་ཡུལ་གྱི་མི་དམངས་ཚོའི་འབོད་སྐུལ་དང་རེ་འདུན་འདི་རྣམས་བདེན་པ་བདེན་ཐོག་གི་སྤེལ་བ་མཐོང་རྒྱུ་དཀོན་པས་རེ་བར་གཞུང་ཕྱོགས་ཀྱི་གསར་འགྱུར་བརྒྱུད་ལམ་གྱི་གསར་འགོད་པས་དམངས་ཁྲོད་ལ་སྐྱོད་དེ་གནོད་འཚེ་ཕོག་ཡུལ་གྱི་མང་ཚོགས་ཚོའི་ཞིབ་ཕྲའི་དཀའ་ངལ་ལ་བརྒྱུས་མངའ་ཤེས་རྟོགས་ཡོང་བ་ཞུ་རྒྱུ་ཡིན། གསན་མཁན་རྣམ་པ་ཚོ་དེ་རིང་གི་ལེ་ཚན་འདི་སྙན་སྒྲོན་ཞུ་མཚམས་འདིར་བཞག་གི་ཡིན། གོང་ཞུས་ཀྱི་ལེ་ཚན་འདི་རྩོམ་པ་རང་ཉིད་ཀྱི་གཟིགས་ཚུལ་ཡིན་པ་ལས་འདི་ག་ཨེ་ཤི་ཡ་རང་དབང་རླུང་འཕྲིན་ཁང་གི་ལྟ་བ་ཡིན་པས་ཁྱབ་ཀྱི་མེད་ལ་ང་ཚོའི་གསམ་མཁན་རྣམ་པ་ཚོས་ལེ་ཚན་འདི་གསན་པར་ཐུགས་བརྗེ་ཆེ་ཞུ་རྒྱུ་དང་ལེ་ཚན་འདི་ཕབ་སྒྱུར་དང་སྙན་སྒྲོན་ཞུ་མཁན་སྒྲོལ་དཀར་ཡིན། [...]

དེ་རིང་གི་ཉིན་མོ།

༢༠༠༧ལོའི་ཟླ་༡༠ཚེས་༡༧ཉིན་ཨ་རིའི་གྲོས་ཚོགས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་གྲོས་ཚོགས་ཀྱི་གཟི་བརྗིད་ཆེ་བའི་གསེར་གྱི་གཟེངས་རྟགས་འདི་བཞིན་ཨ་རིའི་གྲོས་ཚོགས་ནང་སྲིད་འཛིན་སྦུ་ཞི་མཆོག་ནས་གྲོས་ཚོགས་ཀྱི་ཚོགས་གཙོས་དབུས་པའི་ཆེས་མཐོའི་མི་སྣ་ཚོ་ལྷན་འཛོམས་ཐོག་འབུལ་གནང་མཛད་ཡོད་པ་རེད།

གནས་སྣང་དགོན་པར་ས་ཡོམ་གྱི་གནོད་འཚེ་ཕོག་པ།

ཟླ་༡༠ཚེས་༦ཉིན་བོད་ཀྱི་འདམ་གཞུང་རྫོང་ནང་ས་ཡོམ་གྱི་གནོད་འཚེ་བྱུང་སྐབས་ལྷ་ས་ཚུད་པའི་དེ་མིན་ས་གནས་མང་པོ་ཞིག་ལ་ཡང་གནོད་འཚེ་བྱུང་ཡོད་པ་དང་། རྒྱ་ཡིག་གི་དྲ་རྒྱ་གཅིག་གི་ཐོག་ནས་ལྷ་སའི་ཉེ་འགྲམ་གྱི་སྟོད་ལུང་བདེ་ཆེན་རྫོང་ཁོངས་སུ་ཡོད་པའི་ཀརྨ་བཀའ་རྒྱུད་ཀྱི་གནས་སྣང་དགོན་པར་ཡང་ས་ཡོམ་གྱི་གནོད་འཚེ་ཚབས་ཆེན་ཕོག་ཡོད་པ་ཤེས་རྟོགས་བྱུང༌། དྲ་རྒྱ་འདིའི་ཐོག་ནས་གཤམ་གྱི་འདྲ་པར་འདི་རྣམས་མཐོང་བྱུང༌།

ལྷ་སའི་སྤུས་ཁ་ཞན་པའི་དངོས་ཟོག་རྫུན་མ་འདི་ཚོ་བསྡུ་འགྲེམ་བྱེད་སའི་ལྟེ་གནས།

གསན་ན། ཁྲོམ་གཟིགས་ཁང་གི་དངོས་ཟོག་ཙག་ཙིག་སྡེབ་འཚོང་རྒྱབ་སའི་ཁྲོམ་རྭ་འདི་ལྷ་སའི་ཚོང་ཟོང་ཙག་ཙིག་སྡེབ་འཚོང་རྒྱབ་སའི་ཁྲོམ་རྭ་ཆེ་ཤོས་འདི་ཡིན་པ་དང། འདིའི་ནང་གི་ཚོང་རྒྱག་མཁན་གཙོ་བོ་རྒྱ་ནག་གི་ཧུའུ་སྦད་དང་ཧྲན་ཤིའི་གི་རྒྱ་མི་ཚོང་པ་ཚོ་ཡིན་པ་མ་ཟད། དེ་བཞིན་ཀན་སུའུ་དང་མཚོ་སྔོན་ནས་ཡོང་བའི་ཁ་ཆེའི་ཚོང་པ་ཡང་ཡོད་པ་རེད། ད་ལྟ་སྦད་ཏུའུ་དྲ་རྒྱའི་ཐོག་ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་ཅེས་བྲིས་ནས་འཚོལ་ཞིབ་བྱེད་སྐབས་རྩོམ་ཡིག་ཁག་མི་འདྲ་བ་གཉིས་མཐོང་བྱུང༌། གནས་ཚུལ་གཅིག་ནི་ལྷ་སར་འདྲ་བཤུས་བྱས་ནས་བཟོས་པའི་ཧན་ཀྲེང་ཁྲོམ་གཞུང་ཐོག་ཧུའུ་སྦད་ཀྱི་མི་ཡོད་པ་ཟེར་རྩོམ་ཞིག་འདུག ཧན་ཀྲེང་ཁྲོམ་གཞུང་ཟེར་བ་འདི་ཧུའུ་སྦད་ཞིང་ཆེན་གྱི་ཝུའུ་ཧན་གྲོང་ཁྱེར་ནང་ཡོད་པ་དང་། རྒྱ་ནག་ནང་སྐད་གྲགས་ཡོད་པའི་ཚོང་ཟོག་ཙག་ཙིག་བཙོང་སའི་ཁྲོམ་གཞུང་གཅིག་ཡིན་པ་རེད། གནས་ཚུལ་ནང་འཁོད་པར་ལྷ་སའི་པེ་ཅིང་ཤར་ལམ་ཐོག་ཡོད་པའི་ཁྲོམ་གཟིགས་ཁང་གི་དངོས་ཟོག་ཙིག་ཙིག་སྡེབ་འཚོང་རྒྱག་སའི་ཁྲོམ་རྭ་འདིར་ལྷ་སའི་ཧན་ཀྲེང་ཁྲོམ་གཞུང་ཅེས་འབོད་ཀྱི་ཡོད་པ་བརྗོད་བཞག གང་ཡིན་ཞུས་ན་འདིའི་ནང་ཚོང་རྒྱག་མཁན་བརྒྱ་ཆ་༨༠ཧུའུ་སྦད་ཀྱི་མི་ཡིན་པ་རེད། འདིའི་ནང་གྱོན་ཆས་དང་ཕྲུ་གུའི་རྩེད་ཆས། རས་ཆ། ཉལ་ཁྲིའི་སྟེང་བེད་སྤྱོད་བྱེད་པའི་ཉལ་ཆས་ལ་སོགས་པའི་ཚོང་ཟོག་དང་། དེ་བཞིན་ཁབ་རྐུད། ལྷམ་དང་ཞྭ་མོ་ལ་སོགས་པའི་དངོས་ཟོག་ཧན་ཀྲེང་ཁྲོམ་གཞུང་ཐོག་ཡོད་པ་ཆ་ཚང་ཁྲོམ་གཟིགས་ཁང་ནང་ཧ་ལམ་ཚང་མ་ཡོད་པ་རེད་ཅེས་འཁོད་བཞག ད་དུང་གནས་ཚུལ་གཞན་ཞིག་ནང་འགོ་བརྗོད་དུ་སྐུ་འབུམ་གྱི་མི་ལྷ་སར་འཚོ་བ་ཟེར་བའི་རྩོམ་གཅིག་ཡོད་པ་དང་དེའི་ནང་གི་སྐུ་འབུམ་གྱི་མི་ཟེར་བ་འདི་མཚོ་སྔོན་ཞིང་ཆེན་སྐུ་འབུམ་རྫོང་ནས་ཡིན་པའི་རྒྱ་ཁ་ཆེ་ཚོ་ཡིན་པ་རེད། གནས་ཚུལ་ནང་འཁོད་པར། པེ་ཅིང་ཤར་ལམ་ནི་ལྷ་ས་གྲོང་ཁྱེར་གྱི་དངོས་ཟོག་ཙག་ཙིག་བཙོང་ཡུལ་ཞིག་ཡིན་པ་དང་འདིར་ཚོང་ཁང་ལྔ་བཅུ་ལྷག་ཙམ་ཡོད་པའི་ནང་ཚོང་ཁང་༢༥ཙམ་ནི་སྐུ་འབུམ་ནས་ཡོང་པའི་རྒྱ་ཁ་ཆེ་ཚོའི་ཚོང་ཁང་ཡིན་ཞིང་ཚོང་གཉེར་བྱེད་ཡག་གཙོ་བོ་ནི་ཤིན་ཏོག་སྐམ་པོ་དང་ཁ་ཟས། འོ་རྩམ། སྟབས་བདེའི་ཐུག་པ། བྱི་རིལ་སོགས་བཟའ་ཆའི་རིགས་ཀྱི་ཚོང་ཟོག་ཡོད་ལ། ཚོང་ཁང་ཁག་གི་བདག་པོ་ཚོ་ཏའ་ཚལ། ཧྲང་ཤིན་ཀྲོང༌། ཀུང་ཧེའི་སོགས་ས་གནས་ཀྱི་ཞིང་པ་དང་། ལས་ཀ་ཤོར་བའི་ལས་བཟོ་ཡང་ཡོད་པ་རེད། སྐུ་འབུམ་ནས་བོད་ལ་རསྐྱོད་མཁན་གྱི་ཚོང་པ་ཚོས་རང་ཉིད་ཀྱི་འབད་བརྩོན་བྱས་པ་དང་འཇོན་ཐང་ལ་རྟེན་ནས་ལྷ་ས་གྲོང་ཁྱེར་གྱི་བཟའ་ཆའི་རིགས་ཀྱི་ཁྲོམ་རྭ་འདི་ཟིན་ནས་ཡོད་པ་རེད། ཁྲོཁྲོམ་གཟིགས་ཁང་གི་ཙག་ཙིག་སྡེབ་འཚོང་ཁང་འདི་ནས་གྲངས་ལས་འདས་པའི་ཚོང་ཟོག་ཙག་ཙིག་མང་པོ་འགྲིམ་ཚོང་བྱེད་ཀྱི་ཡོད། གང་ཡིན་ཞུས་ན་འདིའི་ནང་གི་ཚོང་ཟོག་རིན་གོང་དམའ་བ་དང་། ཉོ་ཆ་རྒྱབ་པར་ཡོང་མཁན་གཙོ་བོ་ཧ་ལམ་ཚང་མ་བོད་པ་ཡིན་པ་རེད། དེ་ཡང་བོད་པའི་ནང་གི་དཔལ་འབྱོར་ཡོང་བབ་དམའ་བའི་མི་དང་གྲོང་ཁྱེར་ནང་གི་མང་ཚོགས་དབུལ་ཕོངས་ཚོ། དེ་བཞིན་ཞིང་འབྲོག་མང་ཚོགས་སོགས་ཡིན་པ་རེད། དེར་རྟེན་འདིའི་ནང་ཚོང་རྒྱག་མཁན་གྱི་ཕྱི་ནས་ཡོང་བའི་མི་རིགས་གཞན་ཚོས་ཀྱང་ཚང་མས་བོད་སྐད་ཚིག་རེ་གཉིས་བཤད་ཐུབ་ཀྱི་ཡོད་ལ། འགའ་རེ་བོད་ནང་སླེབས་ནས་དུས་ཡུན་རིང་པོ་སོང་བར་རྟེན་བོད་སྐད་བདེ་པོ་ཆགས་ཡོད། དེ་མིན་ཕྱི་ནས་ཤུགས་ལས་བྱེད་པར་ཡོང་མཁན་མི་མང་པོ་ཡང་འདིར་ཉོ་ཆ་རྒྱབ་པར་ཡོང་གི་ཡོད། ཡང་ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་འདི་བོད་ནང་གི་སྤུས་ཁ་ཞན་པའི་དངོས་ཟོག་རྫུན་མ་བསྡུ་འགྲེམ་བྱེད་སའི་ལྟེ་གནས་ཆེ་ཤོས་ཞིག་ཡིན་པ་ལྷ་སའི་མི་ཚང་མས་ཤེས་ཀྱི་ཡོད་པ་རེད། ལྷ་སར་དགོད་དྲོའི་གཏམ་འདི་འདྲ་ཞིག་དར་ཡོད་པ་སྟེ། བརྗོད་ཡག་ལ་ཐེངས་ཞིག་རྒྱལ་ཁབ་རིམ་པའི་དངོས་ཟོག་གི་སྤུས་ཚད་ཞིབ་བཤརེ་རྟགས་དཔྱད་བྱེད་མཁན་གྱི་ཚན་པའི་ལས་དོན་རུ་ཁག་གཅིག་ལྷ་ས་སླེབས་ནས་ལྷ་སའི་ཁྲོམ་རྭ་དང་དམིགས་བསལ་ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་འདིར་རྟགས་དཔྱད་ཞིབ་བཤེར་བྱས་པའི་རྗེས་ཐག་གཅོད་ཀྱི་བྱ་ཐབས་གང་ཡང་ལག་བསྟར་མ་བྱས་པར་ཕྱིར་ལོག་བྱས་ཡོད་པ་རེད། ལྷ་སར་དངོས་ཟོག་རྫུན་མ་སྣ་ཁ་གཅིག་ཀྱང་རྟགས་དཔྱད་ཞིབ་བཤེར་བྱེད་མི་ཐུབ་པ་ཡིན་ནམ། མ་རེད། རྩ་བ་ནས་མ་རེད། དོན་དངོས་ཐོག་ལས་དོན་རུ་ཁག་གིས་རྟགས་དཔྱད་བྱས་པའི་འབྲས་བུ་ནི་ཧ་ལམ་ཚང་མ་སྤུས་ཁ་ཞན་པའི་དངོས་ཟོག་རྫུན་མ་ཡིན་པར་རྟེན་ལས་དོན་རུ་ཁག་ནས་རྟགས་དཔྱད་ཀྱི་ལས་དོན་ཁག་མཚམས་འཇོག་མ་བྱེད་རང་བྱེད་ཐུབ་ཡོད་པ་རེད་འདུག གང་ཡིན་ཞུས་ན་གལ་ཏེ་ཐག་གཅོད་བྱས་པ་ཡིན་ན་ལྷ་སའི་ཁྲོམ་རྭ་ཐོར་རྒྱུ་རང་ཡིན་པ་རེད། དདངོས་གནས་བྱས་ན་འདི་དགོད་དྲོའི་གཏམ་ཞིག་མ་ཡིན་པར་གནས་ཚུལ་ངོ་མ་ཡིན་པ་རེད། ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་འདིའི་ནང་སྐད་གྲགས་ཡོད་པའི་མིང་བེད་སྤྱོད་བྱས་པའི་དངོས་ཟོག་རྫུན་པ་སྣ་ཚོགས་དང་དུས་ཚོད་ཡོལ་བའི་དངོས་ཟོག་སྣ་ཚོགས་ཀྱིས་ཁེངས་ནས་ཡོད། གང་ལྟར་རྒྱ་ཡིག་མ་ཤེས་མཁན་གྱི་བོད་པ་མང་པོ་འདིར་སྐྱོད་ཀྱི་ཡོད་པ་རེད་ལ། འདིར་དངོས་ཟོག་རིན་གོང་དམའ་བ་ཡོད། རང་ལ་སྒོར་འགའ་ཤས་ལས་མེད་པས་དངོས་ཟོག་རྫུན་མ་མ་ཉོས་ན་ད་དུང་གང་ཉོ་ཐུབ་ཀྱི་རེད་དམ། ཡིན་ནའི་ཞེད་སྣང་ཆེ་བ་ཞིག་ལ་ལྷ་སར་བྱ་དངོས་གསར་པ་དཔྱིད་ཀྱི་དཔལ་ཡོན་ལྟར་ཤར་བའི་རྫིགས་ཉམས་དོད་པའི་ཁྲོམ་རྭ་ཆེན་པོ་འདི་ཚོས་ཀྱང་ཁྲོམ་གཟིགས་ཁང་གི་དངོས་ཟོག་ཙག་ཙིག་སྡེབ་འཚོང་གི་ཁྲོམ་རྭ་ནས་ཚོང་ཟོག་ཐེན་གྱི་ཡོད་པ་རེད་འདུག ན་ནིང་ཟླ་བ་བརྒྱད་པའི་ནང་གུས་མོས་ལྷ་སའི་ནུབ་ངོས་སུ་ཡོད་པའི་ཚོང་ཁང་ཆེ་ཤོས་སྦད་ཧྲེང་ཁྲོམ་རྭར་བཅར་འདྲི་ཞུ་བར་ཐེངས་གཅིག་སྐྱོད་མྱོང་ཡོད། ཚོང་ཁང་འདིའི་འགན་འཛིན་མི་སྣས་ཁྲ་ཁྲ་སིལ་སིལ་གྱི་དངོས་ཟོག་ལ་འཛུབ་མོ་བཙུགས་ཏེ་ངོས་ལེན་བྱ་དོན་ལ་ཚོང་ཟོག་ཁག་གཅིག་ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་ནས་ཐེན་པ་རེད་ཅེས་དང་ཡང་ཁོང་གིས་རྒྱུ་མཚན་གསེད་བཀྲོལ་བྱས་ནས་བརྗོད་པར་ད་ལྟ་ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་འདི་སྔོན་མ་དང་བསྡུར་ཐབས་མེད་པ་ཞིག་རེད། རྫུན་མ་མེད་པ་དང་དངོས་ཟོག་སྤུས་ཚད་ཞིབ་བཤེར་ཚན་པ་ནས་རྟག་ཏུ་རྟགས་དཔྱད་བྱེད་པར་ཡོང་གི་ཡོད། དེས་མ་ཚད་ང་ཚོའི་ངོས་ནས་ཀྱང་ཁྲོམ་གཟིགས་ཁང་ནས་ཚོང་ཟོག་འཐེན་པ་ཡིན་ན་སྟབས་བདེ་བ་འདུག དེས་མིན་ན་བོད་དང་རྒྱ་ནག་དབར་རྒྱང་ཐག་རིང་པོ་ཡིན་པ་དང་དངོས་ཟོག་དབོར་འདྲེན་ཐོག་ལ་ཡང་ལས་སླ་པོ་རྩ་བ་ནས་མེད་པ་རེད་ཅེས་བརྗོད་བྱུང༌། བཅར་འདྲི་འདི་ཞུ་སྐབས་གུས་མོས་སྐབས་འཕྲལ་བརྙན་པར་ཡང་རྒྱབ་ཡོད་པས་འདིའི་ཁྲོད་ནས་དཔང་རྟགས་བྱས་ཆོག དེར་རྟེན་འདི་ལོ་ཟླ་བ་བརྒྱད་པའི་ནང་གུས་མོ་ལྷ་ས་ཡོད་སྐབས་མི་ཚང་མས་བརྗོད་ཡག་ལ་ཟླ་བ་གསུམ་པའི་ཚེས་༡༤ཉིན་མོ་འདིར་བོད་མི་ཚོས་ཁྲོམ་གཟིགས་ཁང་གི་སྡེབ་འཚོང་ཁྲོམ་རྭ་འདི་མེ་སྲེག་བཏང་བར་རྒྱུ་མཚན་ཡོད་པ་བརྗོད་ཀྱི་འདུག [...]

དེ་རིང་གི་ཉིན་མོ།

༡༩༡༡ལོའི་ཟླ་༡༠ཚེས་༡༠ཉིན་རྒྱ་ནག་ལ་གསར་བརྗེའི་དམག་དཔུང་ནས་ཝུའུ་ཁྲའང་དུ་འོས་ལངས་བྱས་ཏེ་མའན་ཆིང་གཞུང་མགོ་རྟིག་བསློག་ནས་རྒྱ་ནག་མི་སེར་རྒྱལ་ཁབ་(ཀྲུང་ཧ་མིང་གོ་)བཙུགས་པ་དང་ཉིན་མོ་འདི་ནི་རྒྱ་ནག་མི་སེར་རྒྱལ་ཁབ་ཀྱི་རྒྱལ་སྟོན་དུས་ཆེན་ཡིན། ༡༩༡༩ལོའི་ཟླ་༡༠ཚེས་༡༠ཉིན་རྒྱ་ནག་རྒྱལ་ཁབ་ཀྱི་ཕ་ཅེས་འབོད་པའི་སྐུ་ཞབས་ུན་ཀྲུང་ཧྲན་གྱིས་རྒྱ་ནག་གསར་བརྗེ་ཚོགས་པ་དེ་རྒྱ་ནག་གོ་མིང་ཏང་ཚོགས་པར་ངོ་སྒྱུར་བྱས། ༢༠༠༠ལོའི་ཟླ་༡༠ཚེས་༡༠ཉིན་ཨ་རིའི་སྲིད་འཛིན་ལྦིལ་ཁ་ལིན་ཌོན་ནས་བཅའ་ཁྲིམས་ལ་མཆན་བཀོད་བྱས་ཏེ་རྒྱ་ནག་ལ་ཇི་སྲིད་བར་གྱི་རྒྱུན་ལྡན་ཉོ་ཚོང་འབྲེལ་བའི་ཐོབ་ཐང་དངོས་སུ་སྤྲད།(འཇམ་དཔལ་ཕུན་ཚོགས་ལགས་ཀྱིས་ཕྱོགས་སྒྲིག་གནང།)